සත්ව ඝාතනය පාලනයට අවධානය යොමුවේ, දණ්ඩ නීති සංග්‍රහය සංශෝධනය කිරීමට පියවර
අසාධාරණ ලෙස සිදුවන සත්ව ඝාතනය පාලනයට දණ්ඩ නීති සංහ්‍රහය හැකි ඉක්මනින් සංශෝධනය කිරීමට පියවර ගන්නා බව වනජීවී හා වන සං‍රක්ෂණ අමාත්‍ය සී.බී රත්නායක මහතා සදහන් කළේය. ඒ මහතා මේ බව පවසා සිටියේ ජනාධිපති නීතිඥ පාර්ලිමේන්තු මන්ත්‍රී ජයන්ත වීරසිංහ මහතා වනජීවී හා වන සං‍රක්ෂණ කටයුතු පිළිබද අමාත්‍යාංශයීය උපදේශක කාරක සභාවේ දී මතුකළ ප්‍රශ්නයකට පිළිතුරු දෙමිනි.
ජයන්ත වීරසිංහ මහතා කාරක සභාවේ දී අවධාරණය කර සිටියේ මේ වනවිට සත්ව ඝාතනය සීඝ්‍රයෙන් ඉහළ ගොස් ඇති බවත්, සත්ව ඝාතකයන්ට එරෙහිව නීතිය දැඩිව ක්‍රියාත්මක කළ යුතු බවත්ය. ඊට පිළිතුරු ලෙස අමාත්‍ය සී.බී රත්නායක මහතා මෙහි දී පෙන්වා දුන්නේ ව්‍යවස්ථාදායක කාර්ය පාර්ලිමේන්තුවට පැවරී ඇති බැවින්, සත්ව ඝාතනය පාලනය සඳහා දණ්ඩ නීති සංහ්‍රහය සංශෝධනය කිරීම කඩිනමින් සිදු කල හැකි බවයි.
හීලෑ අලි ඇතුන් නියාමනයට කඩිනම් වැඩපිළිවෙලක් අවශ්‍ය බව ද වනජීවී හා වන සං‍රක්ෂණ කටයුතු පිළිබද අමාත්‍යාංශයීය උපදේශක කාරක සභාවේදී සාකච්ජා විය. ඊට අදාළ අණ පනත් සංශෝධනය කිරීමේ අවශ්‍යතාව පිළිබඳවද මෙහිදී විශේෂ අවධානයක් යොමු විය.
