හෝමාගම පොලිස් අත්අඩංගුවේදී සැකකරු මියගියේ පහරදීමකින් සිදුවූ තුවාල නිසා බවට විශ්වාස කෙරේ; නිල ක්‍රියාපටිපාටිය උල්ලංඝනය වූ බව ජ්‍යෙෂ්ඨ නියෝජ්‍ය පොලිස්පතිවරයා පිළිගනී
හෝමාගම පොලිස් අත්අඩංගුවේ පසුවෙද්දී මියගිය සැකකරුගේ මරණය පහරදීමකින් සිදුවූ බරපතළ තුවාල හේතුවෙන් සිදුවන්නට ඇතැයි පොලිසිය විශ්වාස කරන බවත්, අදාළ සැකකරු සම්බන්ධයෙන් කටයුතු කිරීමේදී පොලිස් නිලධාරීන් නියමිත විධිමත් ක්‍රියාපටිපාටිය අනුගමනය කිරීමට පැහැදිලිවම අපොහොසත් වී ඇති බවත් බස්නාහිර පළාත් භාර ජ්‍යෙෂ්ඨ නියෝජ්‍ය පොලිස්පති (SDIG) සංජීව මේදවත්ත මහතා අනාවරණය කළේය.
මෙම අත්අඩංගුවේ මරණයට අදාළව හෝමාගම පොලිසියේ අපරාධ අංශයේ ස්ථානාධිපතිවරයා (OIC) මේ වන විට අත්අඩංගුවට ගෙන ඇති අතර, තවත් නිලධාරීන් කිහිපදෙනෙකුගේ වැඩ තහනම් කරමින් විනය ක්‍රියාමාර්ග ගෙන තිබේ.
සිදුවෙමින් පවතින විමර්ශන පිළිබඳව අදහස් දැක්වූ ජ්‍යෙෂ්ඨ නියෝජ්‍ය පොලිස්පතිවරයා සඳහන් කළේ, මූලික වෛද්‍ය වාර්තාවලට අනුව මියගිය තරුණයාගේ ඉළඇට තුනක් බිඳී ගොස් ඇති බවත්, හිසට සිදුවූ දරුණු හානි සහ මොළය අභ්‍යන්තරයේ රුධිර වහනයක් සිදුව ඇති බවට විමර්ශන නිලධාරීන්ට තොරතුරු ලැබී ඇති බවත්ය. ඒ අනුව මෙම මරණය පහරදීමක් හා සෘජුව සම්බන්ධ බවට පොලිසිය විශ්වාස කළද, ඊට අදාළ නිශ්චිත හේතුව තහවුරු කළ හැක්කේ සම්පූර්ණ අධිකරණ වෛද්‍ය පරීක්ෂණ සහ විමර්ශන අවසන් වීමෙන් පසුව බව ඔහු පැහැදිලි කළේය.
මීට අමතරව, සැකකරු පොලිස් සිරමැදිරියට (කූඩුවට) දැමීමට පෙර හෝමාගම පොලිසියේ අපරාධ අංශය තුළ රඳවාගෙන සිටියදී ඔහුට පහරදී ඇති බවටද තොරතුරු ලැබී ඇති බවත්, එම චෝදනාව මෙතෙක් නිල වශයෙන් තහවුරු වී නොමැති අතර ඒ පිළිබඳවද විශේෂ විමර්ශනයක් ක්‍රියාත්මක බවත් හෙතෙම පැවසීය.
අත්අඩංගුවට ගැනීමට පෙරත් පහරදීමක්?
විමර්ශනවලදී හෙළිවූ තවත් සුවිශේෂී කරුණක් අනාවරණය කළ ජ්‍යෙෂ්ඨ නියෝජ්‍ය පොලිස්පතිවරයා, මෙම සැකකරු ඔක්තෝබර් 25 වැනිදා අලුයම පොලිස් අත්අඩංගුවට ගැනීමට පෙර දින, එනම් ඔක්තෝබර් 24 වැනිදාද වෙනත් පාර්ශ්වයක ප්‍රහාරයකට ලක්ව ඇති බව හෙළිවූ බව ප්‍රකාශ කළේය.
දෙපිරිසක් අතර ඇතිවූ ගැටුමකින් පසු ඔක්තෝබර් 24 වැනිදා සැකකරු රෝහල්ගතව සිට ඇති අතර, තමන් බයිසිකලයකින් ඇදවැටුණු බවට එහිදී ඔහු වෛද්‍යවරුන්ට පවසා තිබේ. රෝහලේ පැය කිහිපයක් රැඳී සිටීමෙන් පසු ඔහු වෛද්‍ය නිර්දේශයකින් තොරව රහසිගතව රෝහලෙන් පිටව ගොස් ඇතැයිද මේදවත්ත මහතා පැවසීය.
“ඔහු අත්අඩංගුවට ගන්නා අවස්ථාවේදීත් ප්‍රකාශ කළේ තමන් බයිසිකලයකින් වැටී රෝහල්ගත වූ බවයි. නමුත් විමර්ශනවලදී හෙළිවුණේ දෙපිරිසක් අතර ඇතිවූ ගැටුමකදී ඔහු සැබැවින්ම පහරකෑමට ලක්ව ඇති බවයි,” යනුවෙන් ජ්‍යෙෂ්ඨ නියෝජ්‍ය පොලිස්පතිවරයා සඳහන් කළ අතර, ඔක්තෝබර් 24 වැනිදා සිදුවූ එම පහරදීම පිළිබඳවද වෙනම විමර්ශනයක් ක්‍රියාත්මක බව තහවුරු කළේය.
පොලිස් නිල ක්‍රමවේදය බරපතළ ලෙස කඩ කරලා
සැකකරු අත්අඩංගුවට ගන්නා අවස්ථාවේදී ඔහුට බරපතළ රෝගී තත්ත්වයක් පවතින බවක් වාර්තා වී නොතිබුණද, පසුව සිරමැදිරිය තුළදී ඔහු අසාධ්‍ය තත්ත්වයක් පෙන්නුම් කිරීම නිසා රෝහල්ගත කිරීමට නිලධාරීන් පියවර ගෙන ඇත.
කෙසේවෙතත්, සැකකරුවෙකු අත්අඩංගුවට ගැනීමේදී අනුගමනය කළ යුතු අනිවාර්ය නීතිමය හා පරිපාලන ක්‍රියාමාර්ග කිහිපයක්ම හෝමාගම පොලිස් නිලධාරීන් විසින් පැහැර හැර ඇති බව සංජීව මේදවත්ත මහතා පිළිගත්තේය.
අත්අඩංගුවට ගන්නා අවස්ථාවේදී සැකකරුගේ ශාරීරික සෞඛ්‍ය තත්ත්වය නිසි ලෙස ලේඛනගත කිරීම, නියමිත පොලිස් පොත්පත් වාර්තා පවත්වාගෙන යාම, ප්‍රශ්න කිරීම්වලදී ස්ථාපිත නීතිමය ක්‍රමවේද අනුගමනය කිරීම සහ අත්අඩංගුවට ගැනීම පිළිබඳව සැකකරුගේ ඥාතීන් කඩිනමින් දැනුවත් කිරීම යන මූලික පියවර නිසි ලෙස සිදුවී නොමැත.
“අදාළ නිලධාරීන් මෙම ක්‍රමවේද නිසි පරිදි අනුගමනය කර තිබුණේ නැහැ. අදාළ නිලධාරීන්ට එරෙහිව අපි මෙතරම් කඩිනමින් විනය ක්‍රියාමාර්ග ගත්තේ ඒ නිසයි,” යනුවෙන් ඔහු අවධාරණය කළේය.
අපරාධ අංශ ස්ථානාධිපතිවරයා අත්අඩංගුවට ගැනීමෙන් හෝ නිලධාරීන්ට දඬුවම් කිරීමෙන් පමණක් මෙම විමර්ශනය අවසන් නොවන බවත්, පොලිස් භාරයේ සිටියදී සැකකරුට පහරදීමක් සිදුවූයේද යන්න සහ මරණයට හේතුවූ නිශ්චිත සාධකය කුමක්ද යන්න තහවුරු කරගැනීම සඳහා පුළුල් පරීක්ෂණ ක්‍රියාත්මක බවත් ජ්‍යෙෂ්ඨ නියෝජ්‍ය පොලිස්පතිවරයා වැඩිදුරටත් කියා සිටියේය.
ඒ අනුව ඔක්තෝබර් 24 වැනිදා පිටතදී සිදුවූ පහරදීම මෙන්ම ඔක්තෝබර් 25 වැනිදා හෝමාගම පොලිසිය තුළ සිදුවූ සිදුවීම් මාලාව යන දෙඅංශයම ඔස්සේ අපරාධ පරීක්ෂණ අංශ පූර්ණ පරීක්ෂණයක් පවත්වයි.
