“ඔයාලගේ රටවල පාස්පෝට් තියෙන අයට ලැබෙන්නේ ඔහොම සැලකිලි තමයි!”: ඩබ්ලින් ගුවන්තොටුපොළේදී Ryanair කාර්ය මණ්ඩලය කළ ජාතිවාදී ප්‍රහාරය ගැන සංගක්කාරගෙන් සැර හෙළිදරව්වක්!
අයර්ලන්තයේ ඩබ්ලින් ජාත්‍යන්තර ගුවන්තොටුපොළේදී (Dublin Airport) සිය පවුලේ සාමාජිකයන් සමඟ ගමන් කරමින් සිටියදී ‘රයන්එයාර්’ (Ryanair) ගුවන් සේවයේ දොරටු කාර්ය මණ්ඩලය (Gate staff) විසින් තමන් වෙත එල්ල කරන ලද වාර්ගික වෙනස්කොට සැලකීම් සහ අනිසි බලපෑම් පිළිබඳව හිටපු ශ්‍රී ලංකා සුපිරි ක්‍රිකට් නායක කුමාර් සංගක්කාර මහතා තවදුරටත් කරුණු හෙළිකර තිබේ.
සමාජ මාධ්‍ය ඔස්සේ විශේෂ සටහනක් තබමින් සංගක්කාර පෙන්වා දෙන්නේ, තමන් සතු ගමන් බලපත්‍රය (Passport) වැනි පාස්පෝට් හිමි මගීන් මෙවැනි අවමන් සහගත සැලකිලි බලාපොරොත්තු විය යුතු බවට ගුවන් තොටුපොළ කාර්ය මණ්ඩලය ප්‍රකාශ කළ බවයි.
තමන්ට සහ තම පවුලට සිදුකළ මෙම අසාධාරණ හා වෙනස්කොට සැලකීම පිළිබඳව ප්‍රශ්න කළ අවස්ථාවේදී, ගුවන් සේවකයන් සමඟ වාද කිරීමට උත්සාහ කළහොත් ඔවුන්ව සෙසු මගීන්ට තර්ජනයක් ලෙස සලකා ගුවන් යානයට ඇතුළු වීම (Boarding) තහනම් කරන බවටද කාර්ය මණ්ඩලය තර්ජනය කර ඇතැයි සංගක්කාර සඳහන් කරයි.
“එය පැහැදිලිවම පිළිකුල් සහගත ජාතිවාදයක්!”
මෙවැනි සැලකිලි සියලු මගීන්ට එක හා සමානව සිදුකරන සාමාන්‍ය පරීක්ෂණ ක්‍රමවේදයක් බවට කරන ප්‍රකාශයන් තරයේ ප්‍රතික්ෂේප කළ හිටපු නායකයා, ගුවන් ගමන් බලපත්‍රය මුල්කරගනිමින් සිදුකළ එම ප්‍රකාශය අතිශය පිළිකුල් සහගත මෙන්ම පැහැදිලි වාර්ගික වෙනස්කම් කිරීමක් (Racist conduct) බවට දැඩි ලෙස දෝෂාරෝපණය කළේය.
රයන්එයාර් ගුවන් සේවයේ කාර්ය මණ්ඩලය තමන්ට සහ තම පවුලේ සාමාජිකයන්ට වෙනස්කොට සලකමින්, තර්ජනාත්මක හා බියගන්වනසුලු අයුරින් හැසිරුණු බවට සංගක්කාර මීට පෙරද චෝදනා කර තිබිණි. ඔහුගේ පළමු සමාජ මාධ්‍ය සටහන මඟින් ඔහු සඳහන් කර තිබුණේ, තම පවුලේ අයට කාර්ය මණ්ඩලය කතා කළ අයුරු සහ කටයුතු කළ ආකාරය අතිශය කම්පන සහගත මෙන්ම කිසිසේත්ම පිළිගත නොහැකි එකක් බවයි.
මෙම ගැටුම්කාරී තත්ත්වයට තුඩුදුන් නිශ්චිත පසුබිම මෙතෙක් නිල වශයෙන් අනාවරණය වී නොමැති අතර, මෙම චෝදනා පිළිබඳව ස්වාධීන පාර්ශ්වයකින් මෙතෙක් තහවුරු කර නොමැත.
මේ අතර, අදාළ වාර්තා පරීක්ෂා කිරීමේදී සංගක්කාර විසින් එල්ල කරන ලද මෙම බරපතළ චෝදනා සම්බන්ධයෙන් ‘රයන්එයාර්’ (Ryanair) ගුවන් සේවය මෙතෙක් කිසිදු නිල ප්‍රතිචාරයක් ප්‍රසිද්ධියේ දක්වා නොමැති බවද සඳහන් වේ.
