ශ්‍රී ලන්කන් මගී ගුවන් ගමන් මැයි 15 තෙක් අත්හිටුවයි
COVID 19 වසංගතය ව්‍යාප්ත වී යාම හේතුවෙන් විවිධ රටවල් විසින් ගෝලීය ගුවන් ගමන් ජාලය තුළ පනවා ඇති සංචාරක සීමාවන් තව දුරටත් ක්‍රියාත්මක වන හෙයින්, ශ්‍රී ලන්කන් ගුවන් සමාගමට නියමිත මගී ගුවන් ගමන් තාවකාලිකව අත්හිටුවීම ලබන මැයි මස 15 දක්වා දීර්ඝ කර තිබේ.
කෙසේ වෙතත්, රජයට සහය දැක්වීම සඳහා අත්‍යවශ්‍ය බෙහෙත්, වෛද්‍ය සම්පත්, උපකරණ මෙන්ම අත්‍යවශ්‍ය සේවා සඳහා පහසුකම් සැපයීම වෙනුවෙන් ගුවන් සේවයෙහි ගුවන් භාණ්ඩ ප්‍රවාහන සේවා පවතින ලෝක ව්‍යාප්ත ජාලය අනුව අඛණ්ඩව ක්‍රියාත්මක වේ.
එමෙන්ම අවශ්‍ය විටෙක සහ අවශ්‍ය පරිදි විශේෂ මගී ගුවන් ගමන් ශ්‍රී ලන්කන් ගුවන් සේවය විසින් ක්‍රියාත්මක කරන බවත් සමාගම පවසයි.
වැඩිදුර තොරතුරු සහ පැහැදිලි කිරීම් සඳහා මගීන්ට ඔවුන්ගේ සංචාරක නියෝජිතයන් සම්බන්ධ කර ගැනීමෙන්, සහ ලගම ඇති ශ්‍රී ලන්කන් කාර්යාලය වෙතින් මෙන්ම +94117771979 යන දුරකතන අංකයෙන් ගුවන් සමාගමේ ගෝලීය සම්බන්ධතා මධ්‍යස්ථානය ඇමතීමෙන් ලබා ගත හැකි වේ.
එසේම වැඩි විස්තර සඳහා www.srilankan.com වෙබ් අඩවියට පිවිසෙන්න.
