යාපනයේ සිට මහනුවර දක්වා ගමන් කරමින් තිබූ බස් රථයක ක්ලේමෝ බෝම්බයක් ගෙන යමින් සිටි හිටපු එල්.ටී.ටී.ඊ. සාමාජිකාවක හා ඇයගේ සැමියා පරන්තන්හිදී ඊයේ (02 වැනිදා) අත්අඩංගුවට ගෙන ඇත. මෙම බෝම්බය බුමුතුරුණු සහිත බෑගයක සඟවා තිබී ඇති අතර බුද්ධි අංශ ලබා දුන් තොරතුරකට අනුව පොලිස් – හමුදා ඒකාබද්ධ මෙහෙයුමකින් මෙම වැටලීම සිදු කර ඇත. මෙලෙස බෝම්බය ගෙනයන අවස්ථාවේ එම යුවළගේ දරුවාද ඔවුන් සමග සිට තිබේ.
මෙම කොටි ජාලය ස්විට්සර්ලන්තයේ සිට ක්‍රියාත්මක බව හෙළිවී ඇත. මෙම කොටි ජාලය උතුර හා නැගෙනහිර ඉලක්ක දෙකකට ක්ල්මෝ ප්‍රහාර එල්ල කිරීමට බෝම්බ රැගෙන යාමට සූදානම්කර ඇතැයි හෙළිවී ඇත.
2014 අප්‍රේල් 14 වැනිදා නෙඩුන්කර්නි කැලෑවේදී හමුදා ප්‍රහාරයකින් මියගිය එල්.ටී.ටී.ඊ.යේ ගෝපි හෙවත් කජිපන් පොන්නයියා සෙල්වනායගම් යන අයගේ සොහොයුරු ස්විට්සර්ලන්තයේ සිට මෙම ප්‍රහාරය සැලසුම්කර ඇතැයි හෙළිකරගෙන ඇත.
අත්අඩංගුවට ගත් යුවළ පදිංචිව සිට ඇත්තේද අයියකච්චි, පැනික්කච්චිහි පිහිටි ගෝපි නම් ඉහත කී අයගේ මවගේ නිවසට ඉදිරිපිට නිවසකය.
එම අඹුසැමි යුවළගෙන් ලද තොරතුරු මත ඉඩමේ වළ දමා තිබූ අත්බෝම්බයක් හමුවී තිබේ. තවත් වළ දැමූ පුපුරන ද්‍රව්‍ය සොයා ඊයේ (02 වැනිදා) පොලිසිය හා හමුදාව එක්ව මෙහෙයුමක් දියත් කර ඇත.
එල්.ටී.ටී.ඊ. හිටපු සාමාජිකාවක වන අත්අඩංගුවට ගත් සැකකාරිය සතුව තිබූ ක්ලේමෝ බෝම්බය කිලෝ එකකුත් ග්‍රෑම් 800ක් බර වන අතර මෙය නැගෙනහිරට යැවීමට නියමිතව තිබී ඇත. මෙම බෝම්බය තමාට ලැබුණේ යතුරුපැදිකරුවකුගෙන් බවට ඇය හෙළිකර තිබේ.
මෙම කාර්ය සඳහා විදෙස් කොටි ජාලය ඇයගේ ගිණුමට මුදල් දමා ඇත. ඇය තම හත් හැවිරිදි දරුවා මෙම කටයුත්තට රැගෙන ගොස් ඇත්තේ සැකයක් ඇති නොවීමේ උපක්‍රමයක් ලෙසය.
මෙම යුවළ යාපනයටත් බෝම්බයක් රැගෙන ගොස් ඇතැයි හෙළිවී තිබේ. මෙම කණ්ඩායමේ ඉලක්කය කුමක් දැයි සෙවීමට යුද හමුදා බුද්ධි අංශය පොලිස් ත්‍රස්ත විමර්ශන ඒකකය මෙහෙයුමක් අරඹා ඇත.
