වුහාන් රෝහලේ අධ්‍යක්ෂක කොරෝනා වයිරසයෙන් මිය යයි
- නිලධාරීන් ගෙයින් ගෙට ගොස් රෝග ලක්ෂණ ඇති නගර වැසියන් සෙවීමේ මෙහෙයුමක.
- රෝගී තත්වයන් වාර්තා කිරීම ප්‍රමාද වුවහොත් දැඩි දඩුවම්.
වුහාන් හි ජ්‍යෙෂ්ඨ වෛද්‍යවරයෙක් කොරෝනා වෛරසය වැළඳී මියගොස් ඇති බව වාර්ථාවේ.
“වුහාන් වුචැං රෝහලේ අධ්‍යක්ෂක ලියු ෂිමිං (Liu Zhiming) අද පෙරවරු 10.30 ට කොරෝනා වයිරසය වැළඳීමෙන් මිය ගියේය” යනුවෙන් චීන මධ්‍යම රූපවාහිනිය වාර්තා කල අතර පසුගිය සතියේ බ්‍රහස්පතින්දා හුබෙයි පළාතේ ඊෂෝ නගරයේ චීන වෛද්‍ය රෝහලේ හිටපු අධ්‍යක්ෂ ෂු ඩෙපු (Xu Depu) වෛරසයෙන් මියගිය බවට ද තහවුරු විය. අඟහරුවාදා රෝහලේ හෙදියක් ඔහුගේ මරණය තහවුරු කළ බව රාජ්‍ය පුවත්පතක් වාර්තා කරයි.
මාරාන්තික වෛරසයෙන් ආසාදිත රෝගීන් සෙවීම සඳහා බලධාරීන් නගරය තුළ විශාල මෙහෙයුමක් ආරම්භ කර තිබෙන බව වාර්ථා වේ.
මිලියන 11 ක ජනතාවක් සිටින වුහාන් හි ගෙයින් ගෙට ගොස් සියලුම ආසාදිත රෝගීන් සොයා මෙහෙයුම් ආරම්භ කර තිබෙන අතර වෛරසය ඇති බවට සැක කරන ඕනෑම කෙනෙකුට අනිවාර්ය පරීක්ෂණයකට මුහුණ දීමට සිදුවන බවත් වෛරස් රෝගීන් සමඟ සමීප සම්බන්ධතා ඇති ඕනෑම අයෙකු නිරෝධායනයකට ලක් කරන බවත් එරට රාජ්‍ය මාධ්‍ය පවසයි.
තාවකාලික ෆැන්ග්කාං රෝහලට සමාන නිරෝධායන මධ්‍යස්ථාන 10 ක් නගරයේ දිස්ත්‍රික්ක අටක් පුරා ස්ථාපිත කෙරෙන අතර මෘදු රෝග ලක්ෂණ පෙන්නුම් කරන පුද්ගලයින් සඳහා අමතර ඇඳන් 11,400 ක් ලබා දීමට සැලසුම් කර ඇති බව වාර්තා වේ. කර්මාන්තශාලා, කාර්මික වතු සහ ප්‍රවාහන මධ්‍යස්ථානවල ගොඩනැගිලි මෙලෙස තාවකාලික නිරෝධායන මධ්‍යස්ථාන බවට පරිවර්තනය කිරීම මේ වන විට ආරම්භ කර තිබෙනවා.
කොරෝනා වෛරස් යුද්ධය ජය ගැනීමටනම්
වුහාන් නගර නිළධාරීන් සඳුදා නිකුත් කළ නියෝගයකින් අනතුරු ඇඟවූයේ උණ සහ කැස්ස වැනි රෝගී තත්වයන් තම ප්‍රාදේශීය නේවාසික කමිටුවලට වාර්තා කිරීම හෝ රෝගාතුර වුවහොත් නිරෝධායනයකට යාම වැනි අනිවාර්ය ක්‍රියාමාර්ග ප්‍රතික්ෂේප කරන පුද්ගලයින් “බලහත්කාරයෙන්” එම ක්‍රියාවලියන්ට යොමුකරන බවත් මෙය කොරෝනා වෛරස් යුද්ධය ජය ගැනීම සදහා වූ ක්‍රියවලියක් බවත්ය.
තවද වාර්තා කිරීම ප්‍රමාද කරන හෝ “වසංගතය පිළිබඳ ව්‍යාජ තොරතුරු හා ගොතන ලද අසත්‍ය ප්‍රකාශ ව්‍යාප්ත කළ” අයට ද දඩුවම් කරන බව ද නියෝගයේ සඳහන් ය.
