ශතවර්ෂයකට ආසන්න කාලයක් පුරා ලොව පුරා විසිරී සිටින කතෝලික බැතිමතුන් වෙත සමීප වීමට ශුද්ධෝත්තම පාප් වහන්සේලා භාවිත කළ ලෝක පූජිත, සුවිශේෂී ‘පෝප්මොබයිල්’ (Popemobile) නිල රථයේ සියවස් සැමරුම නිමිත්තෙන් වතිකානය විසින් විශේෂ ප්‍රදර්ශනයක් ආරම්භ කර තිබේ.
“පෝප්මොබයිල් රථයේ සියවසක්” (A Century of the Popemobile) යන තේමාව යටතේ වතිකාන කෞතුකාගාර පරිශ්‍රයේදී මෙම විශේෂ ප්‍රදර්ශනය පැවැත්වෙන අතර, 1930 වසරේ සිට පාප් වහන්සේලා භාවිත කරන ලද ඓතිහාසික මර්සිඩීස්-බෙන්ස් (Mercedes-Benz) වර්ගයේ සුවිශේෂී මෝටර් රථ අටක් (08) මෙහිදී මහජන ප්‍රදර්ශනය සඳහා එක්කර ඇත.
මෙම සැමරුමට සමගාමීව, මෝටර් රථ සඳහා දැඩි ඇල්මක් දක්වන චිකාගෝ සම්භවයක් සහිත දහහතරවැනි ලියෝ පාප් වහන්සේ (Pope Leo XIV), මර්සිඩීස්-බෙන්ස් සමාගමේ ඉහළ පෙළේ විධායක නිලධාරීන් පිරිසක් හමුවී වතිකානය සමඟ පවතින දිගුකාලීන සහයෝගීතාව වෙනුවෙන් සිය කෘතඥතාව පළ කළහ. මෝටර් රථ තාක්ෂණයේ දියුණුවත් සමඟ පාප් වහන්සේගේ ධර්මදූත චාරිකාවන්හි පරිණාමයද එකට බැඳී ඇති බව පාප් වහන්සේ මෙහිදී සිහිපත් කළහ.
“දශක ගණනාවක් පුරා ‘පෝප්මොබයිල්’ රථය හුදු ප්‍රවාහන මාධ්‍යයකින් ඔබ්බට ගොස්, බැතිමතුන් මුණගැසෙන සුවිශේෂී පාලමක් බවට පත්වුණා. දේව මෙහෙයන් සහ ජනතා හමුවීම්වලදී බැතිමතුන් අසලටම යන්නට පාප් වහන්සේට මඟ පෑදුවේ මෙම රථයයි. ලොවට ඇදහිල්ල, බලාපොරොත්තුව සහ ප්‍රේමය රැගෙන යාමේ ශුද්ධ වූ මෙහෙවර පහසු කරන්නට මෙම තාක්ෂණය විශාල ශක්තියක් වුණා,” යනුවෙන් ලියෝ පාප් වහන්සේ පැවසූහ.
1930 පැරණිතම රථයේ සිට ආරම්භය
මෙම ප්‍රදර්ශනයේ ඇති පැරණිතම මෝටර් රථය වන්නේ 1930 මැයි 23 වැනි දින එකොළොස්වැනි පියුස් පාප් වහන්සේට (Pope Pius XI) ත්‍යාගයක් ලෙස හිමිවූ ‘Mercedes-Benz Nürburg 460’ මාදිලියේ රථයයි. අගනා දැව, ලෝහ කැටයම් සහ බ්‍රෝකේඩ් සේද රෙද්දෙන් ආවරණය කරන ලද සුඛෝපභෝගී අත්පුටුවක් එහි ඇතුළත් විය.
වතිකාන කෞතුකාගාරයේ ඓතිහාසික එකතු කිරීම් අංශයේ භාරකරු සැන්ඩ්‍රෝ බාර්බගල්ලෝ (Sandro Barbagallo) මහතා පෙන්වා දෙන්නේ, සාමාන්‍ය මෝටර් රථ නිෂ්පාදන පෙළකින් ඔබ්බට ගොස්, පාප් වහන්සේගේ ආරක්ෂාව, පහසුව මෙන්ම බැතිමතුන්ට උන්වහන්සේව පැහැදිලිව දර්ශනය වන අයුරින් විශේෂ සැලසුමකට අනුව පසුකාලීනව මෙම රථ නිර්මාණය වූ බවයි.
යුගයෙන් යුගයට වෙනස් වූ ‘පෝප්මොබයිල්’
පසුකාලීනව නිර්මාණය වූ රථ මඟින් පෙන්නුම් කරන්නේ පාප් වහන්සේලා මඟතොටදී බැතිමතුන් සමඟ සෘජුව ගනුදෙනු කිරීමට සහ ළදරුවන්ට ආශීර්වාද කිරීමට දැක්වූ උනන්දුවයි.
1960 දී විසිතුන්වැනි ජෝන් පාප් වහන්සේට: ගැලවිය හැකි පිටුපස වීදුරු සහිත ‘300 d Landaulet’ රථය ලබාදුන්නේ, මඟදෙපස සිටින බැතිමතුන්ට අත දිගුකර ආශීර්වාද කිරීමට හැකිවන පරිදිය.
1980 දී දෙවැනි ජෝන් පාවුළු පාප් වහන්සේට: ජර්මානු සංචාරය වෙනුවෙන් ‘230 G’ රථය නිර්මාණය කරනු ලැබුවේ උස් වූ, විනිවිද පෙනෙන ආරක්ෂිත වීදුරු කුටියක් (Dome) සහිතවය. ඒ මඟින් පාප් වහන්සේගේ ආරක්ෂාව තහවුරු වූ අතරම රැස්ව සිටි මිලියන සංඛ්‍යාත ජනතාවට උන්වහන්සේව පැහැදිලිව දැකබලා ගැනීමට අවස්ථාව හිමිවිය.
ෆ්‍රැන්සිස් පාප් වහන්සේ වෙනුවෙන් විදුලි රථයක්: පාරිසරික සංරක්ෂණයට මුල්තැන දුන් ආර්ජන්ටිනා සම්භවයක් සහිත ෆ්‍රැන්සිස් පාප් වහන්සේ වෙනුවෙන් පසුකාලීනව සම්පූර්ණයෙන්ම පරිසර හිතකාමී විදුලි ‘පෝප්මොබයිල්’ රථයක් හඳුන්වා දීමටද කටයුතු කෙරිණි.
මානව ගරුත්වය, පරිසර සුරක්ෂිතතාව සහ පොදු යහපත උදෙසා තාක්ෂණික නවෝත්පාදනයන් තවදුරටත් යොමුකරන ලෙස වත්මන් ලියෝ පාප් වහන්සේ මෝටර් රථ නිෂ්පාදකයින්ගෙන් වැඩිදුරටත් ඉල්ලා සිටියහ.
