ජනාධිපති ගෝඨාභය රාජපක්ෂ මහතාගේ රට හදන සෞභාග්‍යයේ දැක්ම ප්‍රතිපත්ති ප්‍රකාශයෙන් මෙරට අභ්‍යන්තර ගුවන්සේවා පුළුල් කිරීමේ වැඩසටහන යටතේ කොළඹ සහ යාපනය නව ගුවන් සේවාවක් හෙට (01) සිට ආරම්භ කිරීමට නියමිතයි. රට තුළ අභ්‍යන්තර ගුවන් ගමන් දියුණු කිරිමේ රජයේ ප්‍රතිපත්තියට අනුව මෙය ක්‍රියාත්මක බව කාර්මික අපනය ආයෝජන ප්‍රවර්ධන සංචාරක හා ගුවන්සේවා අමාත්‍ය ප්‍රසන්න රණතුංග මහතා පවසයි. එමෙන්ම ඉදිරි කාලසීමාව තුළදී යාපනය, මඩකලපුව, මත්තල, කටුනායක ගුවන් තොටුපල ආශ්‍රිතවද අභ්‍යන්තර ගුවන් ගමන් වැඩි දියුණු කිරීම කෙරෙහි රජයේ අවධානය යොමු ඇත.
මෙම ගුවන් යානය යොදවා ඇත්තේ ෆිටිස් ගුවන් සමාගම මගිනි. ATR 72 වර්ගයේ මගීන් 70 ක් එකවර ගෙනයා හැකි ගුවන් යානයක් අදාල සමාගම විසින් මේ සඳහා යොදවා ඇති අතර සෑම සෙනසුරාදා, සඳුදා සහ බදාදා දිනකදීම මෙම අභ්‍යන්තර ගුවන් ගමන් ක්‍රියාත්මක වෙයි. රත්මලානෙන් පෙ.ව. 7.30 ට පිටත්වන මෙම යානය යාපනය පලාලි ගුවන්තොටුපලට පෙ.ව. 8.30 ළගා වේ. පෙ.ව. 9.30ට පලාලි සිට රත්මලාන බලා නැවතත් පිටත්වේ. කොළඹ සිට යාපනයට ගමන් ගාස්තුව වන්නේ රු. 7,500කි. ඒ අනුව පළමු ගුවන් යානය හෙට පෙ.ව. 7.30 රත්මලාන ගුවන්තොටුපලෙන් යාපනය බලා ගමන් කිරීමට නියමිතයි.
