මගී ජීවිත අවදානමේ දමා බීමතින් බස් රථය පැදවූ රියදුරුගේ වැඩ තහනම් කිරීමට උපදෙස්
යාපනයේ සිට අක්කරෙයිපත්තු දක්වා ධාවනය වූ ලංගම බස් රථයක රියදුරෙකු බීමත්ව බස් රථය ධාවනය කිරීම හේතුවෙන් අත්අඩංගුවට ගෙන ඇත. පසුගිය 29 වැනිදා A9 මාර්ගයේ ධාවනය කෙරෙන වාහන පොලීසිය, පොලිස් විශේෂ කාර්ය බලකාය හා යුද හමුදා නිලධාරීන් විසින් ඒකාබද්ධව සෝදිසිකිරීමකට ලක් කළ අතර අදාල බස් රථය සෝදිසි කිරීමේදී එහි රියදුරු මත්පැන් පානය කොට බස් රථය ධාවනය කරන බවට අනාවරණය වී ඇත.
වැඩිදුර සෝදිසි කිරීමේදී බස් රථයේ රියදුරු ආසනය සමීපයේ මත්පැන් බෝතලයක් තිබී ඇති අතර වැඩිදුර පරික්ෂා කිරීමේදී එය රියදුරු විසින් ධාවනය කරන අතරතුර පානය කරන බවට අනාවරණය වී ඇත. මගී ජීවිත රැසකගේ ජීවිත අවධානමේ දමමින් බස් රථය බීමතින් ධාවනය කිරීම හේතුවෙන් රියදුරු අත්අඩංගුවට ගෙන බස් රථයේ මගීන් වෙනත් බස් රථයක් ගෙන්වා එමගින් ප්‍රවාහන පහසුකම් සැපයීමට ආරක්ෂක අංශ විසින් පියවර ගනු ලැබීය.
මෙම සිද්ධිය සම්බන්ධයෙන් සිය අවධානය යොමුකල විෂයභාර අමාත්‍ය මහින්ද අමරවීර මහතා අදාළ රියදුරුගේ සේවය අත්හිටුවීමට උපදෙස් දී ඇති අතර මගීන්ට හිරිහැර වන ආකාරයෙන් ක්‍රියා කරන ලංගම මෙන්ම පෞද්ගලික බස් රථ රියදුරන් සම්බන්ධයෙන් දැඩිව නීතිය ක්‍රියාත්මක කරන ලෙසද අදාළ අංශ වෙත උපදෙස් දී තිබේ. අදාළ සිද්ධිය සම්බන්ධව පොලිස් වාර්ථාවක් වහාම ලබාගැනීමටත්, ඉන් අනතුරුව අදාළ රියදුරුගේ වැඩ තහනම් කිරීමටත් අමාත්‍යාංශ ලේකම් ගාමිණී සෙනෙවිරත්න මහතා තීරණය කර ඇත.
