2027–2029 කාලය තුළ හෙද නිලධාරීන් 13,000ක් සේවයට බඳවා ගැනීමට රජය සැලසුම් කරයි; නවක හෙද හෙදියන් 2,819කට පත්වීම් ලිපි පිරිනැමේ
මෙරට රෝහල් පද්ධතිය තුළ පවතින උග්‍ර කාර්ය මණ්ඩල හිඟයට කඩිනම් විසඳුම් ලබාදෙමින්, එළඹෙන 2027 සිට 2029 දක්වා වූ තුන්වසරක කාලය තුළ හෙද හෙදියන් 13,000ක් සෞඛ්‍ය සේවයට බඳවා ගැනීමට රජය සැලසුම් කර ඇති බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා නිවේදනය කළේය.
ඊයේ (01) කොළඹ අරලියගහ මන්දිරයේ පැවති විශේෂ උත්සවයක් අමතමින් අමාත්‍යවරයා සඳහන් කළේ, 2025–2035 ජාතික සෞඛ්‍ය ප්‍රතිපත්තිය සහ උපායමාර්ගික සැලැස්ම යටතේ හඳුනාගෙන ඇති මානව සම්පත් අවශ්‍යතාවන්ට අනුකූලව මෙම බඳවාගැනීමේ සැලසුම් සකස් කර ඇති බවයි.
මුදල් අමාත්‍යාංශයේ කළමනාකරණ සේවා දෙපාර්තමේන්තුවේ අනුමැතියට යටත්ව, ඉදිරි වසර තුන ඇතුළත මෙම හෙද කාර්ය මණ්ඩල 13,000 සේවයට බඳවා ගැනීමට පියවර ගන්නා බව හෙතෙම වැඩිදුරටත් පැහැදිලි කළේය.
නවක හෙද නිලධාරීන් 2,819කට පත්වීම් ලිපි
නව රජයේ සෞඛ්‍ය සේවය ශක්තිමත් කිරීමේ තවත් ප්‍රමුඛ පියවරක් ලෙස, පුහුණුව සාර්ථකව අවසන් කළ නවක හෙද හෙදියන් 2,819 දෙනෙකු වෙත III ශ්‍රේණියේ හෙද නිලධාරී පත්වීම් ලිපි පිරිනැමීම ජනාධිපති අනුර කුමාර දිසානායක මහතාගේ ප්‍රධානත්වයෙන් මෙහිදී සිදුවිය.
මෙලෙස පත්වීම් ලැබූ පිරිස 2020 ශිෂ්‍ය හෙද කණ්ඩායමට අයත් වන අතර, ඔවුන් දිවයින පුරා පිහිටි හෙද විදුහල් 16ක වසර තුනක උසස් ඩිප්ලෝමා (Higher Diploma) පාඨමාලාව සාර්ථකව හදාරා නිමකර ඇත. 2019 සහ 2020 වසරවලදී අ.පො.ස. උසස් පෙළ විභාගයට ගණිත හා විද්‍යා අංශවලින් පෙනී සිටි මෙම පිරිස හෙද විදුහල් වෙත ඇතුළත් කරගනු ලැබුවේ 2023 වසරේදීය.
මෙම නවක හෙද නිලධාරීන් මධ්‍යම රජය සහ පළාත් සභා මඟින් පාලනය වන දිවයින පුරා පිහිටි රෝහල් සහ සෞඛ්‍ය ආයතන වෙත කඩිනමින් සේවයේ යෙදවීමට නියමිතය.
විශේෂ ශ්‍රේණියේ උසස්වීම් සහ රෝහල් සංවර්ධනය
මීට අමතරව, රෝහල් සේවයේ නියුතු I ශ්‍රේණියේ ජ්‍යෙෂ්ඨ හෙද නිලධාරීන් 76 දෙනෙකු වෙත ‘විශේෂ ශ්‍රේණිය’ (Special Grade) දක්වා උසස්වීම් ලිපි පිරිනැමීමද මෙම උත්සවයේදී සිදුකෙරිණි.
රෝගී සත්කාරක සේවාවන්හි ගුණාත්මකභාවය ඉහළ නැංවීම උදෙසා සමස්ත රෝහල් ජාලය පුරා පවතින පුරප්පාඩු කඩිනමින් පියවීමට රජය ප්‍රමුඛතාව ලබාදී ඇති බව අමාත්‍ය වෛද්‍ය නලින්ද ජයතිස්ස මහතා මෙහිදී යළිත් අවධාරණය කළේය.
මෙම උත්සවය සඳහා සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි, සෞඛ්‍ය අමාත්‍යාංශයේ ලේකම් වෛද්‍ය අනිල් ජාසිංහ යන මහත්වරුන් ඇතුළු අමාත්‍යාංශයේ ජ්‍යෙෂ්ඨ නිලධාරීහු විශාල පිරිසක් එක්ව සිටියහ.
