ජීවන බරට සහ අනිවාර්ය හමුදා සේවයට එරෙහිව ජර්මනියේ ‘Gen Z’ තරුණ නැගිටීමක්: නගර 34ක වීදි සටන්, කඩසාප්පු කොල්ලකෑම් සහ ගිනි තැබීම්
ශීඝ්‍රයෙන් ඉහළ යන ජීවන වියදම, අධ්‍යාපන ප්‍රතිපාදන කප්පාදු කිරීම සහ අනිවාර්ය හමුදා සේවය (Compulsory Military Service) හඳුන්වා දීමට එරෙහිව ජර්මනිය පුරා පැවති දැවැන්ත විරෝධතා ව්‍යාපාරය ප්‍රචණ්ඩ මුහුණුවරක් ගනිමින්, එරට ප්‍රධාන නගර කිහිපයක කඩසාප්පු කොල්ලකෑම් සහ පොලිසිය සමඟ දරුණු ගැටුම් හටගෙන ඇති බව වාර්තා වේ.
පසුගිය සෙනසුරාදා (31) බර්ලින්, ෆ්‍රැන්ක්ෆර්ට්, මියුනිච් සහ හැම්බර්ග් ඇතුළු ජර්මනියේ ප්‍රධාන නගර 34ක දසදහස් සංඛ්‍යාත ජනතාව වීථි බසිමින් මෙම විරෝධතාවල නිරත වූහ. මෙම දැවැන්ත විරෝධතා රැල්ල සංවිධානය කර තිබුණේ “Gen Z පෙරමුණ ගනී” යන අරුත දෙන ‘Gen Z regelt’ (Gen Z takes charge) නමැති තරුණ නායකත්වයෙන් යුත් සංවිධානය විසිනි.
රොයිටර් (Reuters) පුවත් සේවයට අනුව, ජර්මනියේ ප්‍රධාන මූල්‍ය කේන්ද්‍රස්ථානය වන ෆ්‍රැන්ක්ෆර්ට් නගරයේ අවම වශයෙන් සුපිරි වෙළෙඳසැල් දෙකක් සම්පූර්ණයෙන්ම කොල්ලකා ඇති අතර, මුහුණු ආවරණය කරගත් කලහකාරීන් විසින් වෙළෙඳසැල් වීදුරු කඩා බිඳ දමමින් ව්‍යාපාරික ස්ථාන රැසකට බරපතළ හානි සිදුකර තිබේ.
මොලොටොව් බෝම්බ, ජල ප්‍රහාර සහ වීදි ගිනි තැබීම්
ෆ්‍රැන්ක්ෆර්ට් පොලිසිය සඳහන් කළේ, කලහකාරීන් විසින් හදිසි සහන සේවා නිලධාරීන් ඉලක්ක කර ‘මොලොටොව් කොක්ටේල්’ (Molotov cocktails – පෙට්‍රල් බෝම්බ) ප්‍රහාර එල්ල කර ඇති බවයි. ප්‍රචණ්ඩත්වය උත්සන්න වීමත් සමඟ නගර මධ්‍යයට පැමිණීමෙන් වළකින ලෙස පොලිසිය සාමාන්‍ය මහජනතාවගෙන් ඉල්ලා සිටියේය.
කලහකාරී පිරිස් විසුරුවා හැරීම සඳහා පොලිසිය ජල ප්‍රහාර සහ ගම්මිරිස් ප්‍රහාර (Pepper spray) එල්ල කළ අතර, ගැටුම්වලදී පොලිස් නිලධාරීන් කිහිපදෙනෙකුම තුවාල ලබා ඇතැයි වාර්තා වේ. මීට අමතරව බර්ලින්, කොලෝන් (Cologne) සහ හැම්බර්ග් යන නගරවලද මාර්ග බාධකවලට ගිනි තබමින් ප්‍රචණ්ඩ ක්‍රියා සිදුවිය.
දිවා කාලයේදී සාමකාමීව පැවති මෙම විරෝධතා, සවස් කාලය එළඹෙත්ම පාලනයෙන් තොර ප්‍රචණ්ඩ මුහුණුවරක් ගත් බව ආරක්ෂක අංශ පෙන්වා දෙයි.
තරුණ පරපුරේ ප්‍රධාන ඉල්ලීම්
විරෝධතාකරුවන් ඉල්ලා සිටින්නේ අධ්‍යාපනය සහ සෞඛ්‍ය ක්ෂේත්‍රය වෙනුවෙන් රජයේ ප්‍රතිපාදන ඉහළ නංවන ලෙසත්, දරාගත නොහැකි ජීවන වියදම පාලනය කිරීමට පියවර ගන්නා ලෙසත්ය. එසේම යෝජිත අනිවාර්ය හමුදා සේවයට දැඩි විරෝධය පළකළ ඔවුන්, රටේ ආර්ථික බර තරුණ පරපුර මත පමණක් පැටවීම නවතා එය සමාජය තුළ සාධාරණව බෙදී යන ක්‍රමවේදයක් සකස් කරන ලෙස බලකර සිටියහ.
බර්ලින් නුවර පැවති විරෝධතාව අමතමින් ‘Gen Z regelt’ සංවිධානයේ ප්‍රකාශිකා ලීනා ෆ්‍රෙඩ්රික් (Lina Friedrich) පැවසුවේ, තමන් සටන් කරන්නේ යුද්ධය හෝ බලහත්කාරී පාලනය වෙනුවෙන් නොව, සාමය සහ සැබෑ නිදහස උදෙසා බවයි.
පොලිස් වාර්තාවලට අනුව ෆ්‍රැන්ක්ෆර්ට්, මියුනිච් සහ බර්ලින් යන නගරවල පමණක් 18,000කට අධික පිරිසක් විරෝධතාවලට එක්ව සිටි අතර, සංවිධායකයින් ප්‍රකාශ කරන්නේ එම නගරවල විරෝධතාකරුවන් 36,000කට ආසන්න පිරිසක් වීථි බැස සිටි බවයි. මෙම විරෝධතා තම වාසියට හරවා ගැනීමට අන්තවාදී කණ්ඩායම් උත්සාහ කළ හැකි බවට ජර්මානු බුද්ධි අංශ මීට පෙර අනතුරු අඟවා තිබිණි.
නගර කිහිපයක ප්‍රචණ්ඩ ක්‍රියා වාර්තා වුවද, ජර්මනිය පුරා පැවති බොහෝ විරෝධතා සාමකාමීව අවසන් වූ බව බලධාරීහු සඳහන් කරති. ආර්ථික පීඩනය සහ දේශපාලන තීන්දු මුල්කරගනිමින් සමස්ත යුරෝපය පුරාම මේ වන විට පැතිර යමින් පවතින දැවැන්ත තරුණ විරෝධතා රැල්ලක තවත් එක් ප්‍රබල සන්ධිස්ථානයක් ලෙස මෙම ජර්මානු නැගිටීම ජාත්‍යන්තර මාධ්‍ය විසින් හඳුන්වා දී ඇත.
