කොළඹ කොටුව – මාලඹේ සැහැල්ලු දුම්රිය ව්‍යාපෘතිය යළි ක්‍රියාත්මක කිරීමට තීරණය කර ඇති බව නාගරික සංවර්ධන හා නිවාස අමාත්‍ය ප්‍රසන්න රණතුංග මහතා පවසයි.
කොළඹ සහ ඒ අවට පවතින දැඩි රථවාහන තදබදයට පිළියමක් ලෙස සැහැල්ලු දුම්රිය ව්‍යාපෘතිය යළි ක්‍රියාත්මක කිරීමට රජය තීරණය කර ඇති බව ඩේලි නිව්ස් වාර්තා කරයි.
මේ සඳහා විකල්ප යෝජනා ලබා ගැනීම සඳහා වූ කැබිනට් පත්‍රිකාවක් අමාත්‍ය ප්‍රසන්න රණතුංග මහතා විසින් පසුගියදා ඉදිරිපත් කරනු ලැබුවා.
කොළඹ, මාලඹේ, ඇතුළු තදාසන්න ප්‍රදේශවල සිටින රාජ්‍ය සේවකයින්ගේ කාලය හා මුදල් ඉතිරි කර ගැනීම සඳහා දුම්රිය සේවාව මගින් රැකියා සඳහා ඉවහල් වන බව අමාත්‍ය රණතුංග මහතා පෙන්වා දෙයි.
මෙම ව්‍යාපෘතිය මුලින් ඉඩම් අත්පත් කර ගැනීමෙන් පසු 2020 දී ආරම්භ කර 2024 මැද භාගය වන විට අවසන් කිරීමට සැලසුම් කර ඇති අතර, ජපාන රජය ඇමරිකානු ඩොලර් මිලියන 1,850 ක ණයක් සහ ජපන් ජාත්‍යන්තර සහයෝගීතා ඒජන්සියෙන් (JICA) මූල්‍ය හා තාක්ෂණික සහාය ලබා දීමට එකඟ විය.
පසුව ශ්‍රී ලංකාවේ ආර්ථික අර්බුදය ඇතුළු විවිධ හේතූන් මත ව්‍යාපෘතිය අත්හිටුවන ලදී.
කෙසේ වෙතත්, ජනාධිපති රනිල් වික්‍රමසිංහ මහතාගේ ජපාන නිල සංචාරය අතරතුර පැවති ද්විපාර්ශ්වික සාකච්ඡාවලින් අනතුරුව සැහැල්ලු දුම්රිය ව්‍යාපෘතිය යළි ආරම්භ කිරීමට ජපාන රජය එකඟ වී තිබේ.
කොළඹ කොටුව – මාලබේ සැහැල්ලු දුම්රිය ව්‍යාපෘතිය කිලෝමීටර් 16 ක් දිග දුම්රිය ස්ථාන 16 කින් සමන්විත වන අතර, මාලඹේ සිට කොළඹ – කොටුව දක්වා විනාඩි 30 කින් ගමන් කළ හැකි වේ.
කාර්ය බහුල වේලාවන්හිදී සෑම විනාඩි හතරකට වරක් සහ සාමාන්‍ය වේලාවන්හිදී සෑම විනාඩි 10කට වරක් දුම්රිය සේවාව ක්‍රියාත්මක වීමට නියමිතය.
