සමුගැනීමේ සාදයක් පැවැත්වූ දොස්තරට කොරෝනා – සහභාගී වූ පිරිස් සොයා පරීක්‍ෂණ
ගම්පොළ ශික්‍ෂණ රෝහලේ වෛද්‍යවරයකු සිය ස්ථාන මාරුව වෙනුවෙන් සාදයක් පවත්වා ඇති අතර, එම වෛද්‍යවරයා කොරෝනා ආසාදිතයකු බවට තහවුරු වීමත් සමගම එම රෝහලේ බාහිර හදිසි ප‍්‍රතිකාර ඒකකය සහ 6, 9 යන වාට්ටු දෙක වසා දමා තිබේ. එමෙන්ම හෙද කාර්ය මණ්ඩලයේ හා කිහිපදෙනෙක් හා වෛද්‍යවරුන් කිහිපදෙනෙක්ද නිරෝධායනයට යොමු කර ඇති අතර එම වෛද්‍යවරයා ඇසුරු කළ පිරිස් සොයා සෞඛ්‍ය අංශ මගින් ඊයේ (07) පරීක්‍ෂණයක් අරඹා තිබේ.
රෝහල් අධ්‍යක්‍ෂ චමිල් විජේකෝන් මහතා පවසන්නේ රෝහලේ සිටි ගැබිනි මවුවරුන් වහාම පේරාදෙණිය රෝහලට හා මහනුවර ජාතික රෝහල වෙත මාරුකර යවා ඇති බවත්ය.
මෙම වෛද්‍යවරයාගේ බිරිඳ ද වෛද්‍යවරියකවන අතර කරාපිටිය රෝහලේ සේවය කරන ඇය කොරෝනා ආසාදනයට ලක්ව සිටින බවද සෞඛ්‍ය අංශ සඳහන් කරයි.
කොවිඩ් ආසාදනයට ලක්වූ මෙම වෛද්‍යවරයා පශ්චාත් සීමාවාසික පුහුණුව ලබා පිටව යෑමට සූදානමින් සිට ඇති අතර පී. සී. ආර්. පරීක්‍ෂණයට ලක්කර සිටි අතරතුර ඔහුට ලැබී ඇති ස්ථාන මාරුවත් සමග රෝහලේ හෙද කාර්යමණ්ඩලය හා කනිෂ්ඨ කාර්යමණ්ඩලය සඳහා වෙනම සාදයකුත්, වෛද්‍යවරු සඳහා ගම්පොළ පෞද්ගලික රෝහල් ශාලාවක තවත් රාත‍්‍රි සාදයකුත් පවත්වා ඇති බවට වාර්තා වේ.
