ශ්රී ලංකාව ක්රියාත්මක කරමින් සිටින පුළුල් දූෂණ විරෝධී ප්රතිසංස්කරණ වැඩපිළිවෙළ පිළිබඳව වියානාහි එක්සත් ජාතීන්ගේ මත්ද්රව්ය හා අපරාධ පිළිබඳ කාර්යාලයේ (UNODC) පැවති 17 වැනි ක්රියාත්මක කිරීමේ සමාලෝචන කණ්ඩායමේ (IRG) පළමු නැවත කැඳවූ සැසියේ ආරම්භක දිනයේදී විශේෂ අවධානය යොමුව තිබේ.
ප්රධාන දේශනයක් පවත්වමින් අල්ලස් හෝ දූෂණ චෝදනා විමර්ශන කොමිෂන් සභාවේ (CIABOC) සභාපති විනිසුරු නීල් ඉද්දවල මහතා ශ්රී ලංකාව නීති ප්රතිසංස්කරණ, ඩිජිටල් විනිවිදභාවය සහ ආයතනික ශක්තිමත් කිරීම සම්බන්ධයෙන් අත්කරගෙන ඇති පරිවර්තනීය ප්රගතිය පිළිබඳව කරුණු ඉදිරිපත් කළේය.
ඔහුගේ අදහස් ජාත්යන්තර නියෝජිතයන්, රාජ්ය පාර්ශ්ව සහ නීති විශේෂඥයන්ගේ පුළුල් ඇගයීමට ලක්වූ බව සඳහන් වේ.
විනිසුරු ඉද්දවල මහතා අවධාරණය කළේ, ශ්රී ලංකාව එක්සත් ජාතීන්ගේ සමාලෝචන යාන්ත්රණය නීතිමය අනුකූලතාව පරීක්ෂා කිරීමේ මෙවලමක් ලෙස පමණක් නොව, සැබෑ ප්රතිසංස්කරණ සඳහා උත්ප්රේරකයක් ලෙසද සලකන බවයි.
2023 අංක 9 දරන දූෂණ විරෝධී පනත මගින් මෙරට නීති රාමුව ප්රතිව්යුහගත කර ඇති බව පෙන්වා දුන් ඔහු, මධ්යගත විද්යුත් වත්කම් හා බැරකම් ප්රකාශ කිරීමේ පද්ධතිය හඳුන්වාදීම පිළිබඳවද සඳහන් කළේය.
දූෂණ අවදානම් අවම කිරීම, විනිවිදභාවය ඉහළ නැංවීම සහ කාර්යක්ෂමතාව වැඩිදියුණු කිරීම අරමුණු කරගත් තාක්ෂණය පදනම් කරගත් වැඩසටහන් රැසක්ද ක්රියාත්මක කර ඇති බව ඔහු පෙන්වා දුන්නේය.
එමෙන්ම “Towards Integrity” හෙවත් “අඛණ්ඩතාව කරා” යන තේමාව යටතේ ක්රියාත්මක වන 2025 සිට 2029 දක්වා වූ ජාතික දූෂණ විරෝධී ක්රියාකාරී සැලැස්ම ක්රියාත්මක කිරීමේ ප්රගතිය පිළිබඳවද සභාපතිවරයා විස්තර කළේය.
පළාත් පාලන ආයතන, පොලිසිය සහ මූල්ය ක්ෂේත්රය සඳහා ධාරිතා වර්ධන වැඩසටහන් ක්රියාත්මක කිරීම මෙන්ම දූෂණයට වැඩි අවදානමක් සහිත රාජ්ය අංශ පද්ධති වෙත සෘජු මැදිහත්වීම් සිදු කිරීමද මෙම වැඩපිළිවෙළට ඇතුළත් බව සඳහන් කෙරිණි.
දේශනය අවසන් කරමින් විනිසුරු ඉද්දවල මහතා ජාත්යන්තර ප්රජාවෙන් ඉල්ලා සිටියේ සමාලෝචන යාන්ත්රණය ප්රායෝගික ප්රතිසංස්කරණ ඉදිරියට ගෙන යන මෙවලමක් බවට පත් කරන ලෙසයි.
ඔහු අවධාරණය කළේ, ශ්රී ලංකාවට අනුව සාර්ථකත්වය මැනිය යුත්තේ පනවන ලද නීති සංඛ්යාව, ස්ථාපිත කළ ආයතන සංඛ්යාව හෝ හඳුන්වා දුන් පද්ධති සංඛ්යාව අනුව නොවන බවයි.
ඒ වෙනුවට එම ප්රතිසංස්කරණ මගින් අඛණ්ඩතාව, වගවීම, මහජන විශ්වාසය සහ රාජ්ය සම්පත් නැවත අත්පත් කර ගැනීම යන ක්ෂේත්රවල මැනිය හැකි දියුණුවක් ඇති කර තිබේද යන්න සැබෑ සාර්ථකත්වයේ මිනුම විය යුතු බව ඔහු සඳහන් කළේය.
නීති ප්රතිසංස්කරණයේ සිට ඩිජිටල් ක්රියාත්මක කිරීම දක්වා විහිදුණු ශ්රී ලංකාවේ මෙම පුළුල් ප්රවේශය සැසියට සහභාගි වූ පාර්ශ්වයන්ගේ ඇගයීමට ලක්ව ඇති අතර, සංවර්ධනය වෙමින් පවතින රටවලට අනුගමනය කළ හැකි ප්රායෝගික උදාහරණයක් ලෙස ශ්රී ලංකාවේ ප්රගතියද එහිදී පෙන්වා දී තිබේ.
