අගෝස්තු 15 වැනිදා P 4447 වේග ප්රහාරක යාත්රාව සම්බන්ධයෙන් සිදුවූ මුහුදු අනතුරෙන් පසු අතුරුදන්ව සිටි නාවික නිලධාරියාගේ බවට සැක කෙරෙන දේහ කොටස් සොයාගත් බව ශ්රී ලංකා නාවික හමුදාව අද තහවුරු කළේය.
නාවික හමුදාව නිකුත් කළ නිවේදනයකට අනුව, නාවික කිමිදුම්කරුවන් විසින් අදාළ යාත්රාව අඩි 80ක් පමණ ගැඹුරක තිබියදී සොයාගෙන ඇත. එම ස්ථානයේ දිය යට දෘශ්යතාව ඉතා සීමිතව පැවති අතර, යාත්රාවේ අභ්යන්තරයේ පටු ස්ථාන පැවතීම හේතුවෙන් මෙහෙයුම දැඩි අභියෝගයකට මුහුණ දී තිබේ.
විශේෂිත කිමිදුම් කටයුතු ආරක්ෂිතව සිදුකළ හැකි මුහුදු සහ දිය යට තත්ත්වයක් පැවති අවස්ථාවකදී දේහ කොටස් සොයාගැනීමේ මෙහෙයුම ක්රියාත්මක කර තිබේ.
අනතුර සිදුවූ අවස්ථාවේ සිට නාවික හමුදාවේ ප්රධාන අවධානය යොමුව තිබුණේ අතුරුදන් වූ නිලධාරියා සොයාගැනීම කෙරෙහිය.
අනතුර සිදුවූ දිනයේදී ඇන්ගුලාන පොලිසියේ සහ ප්රදේශයේ ධීවර ප්රජාවේ සහාය ඇතිව නාවික හමුදා සාමාජිකයන් 11 දෙනෙකු බේරාගෙන තිබූ අතර, ඉන් අනතුරුව පානදුර සිට කොළඹ හරහා හලාවත දක්වා වූ වෙරළ තීරය පුරා පුළුල් සෝදිසි මෙහෙයුම් අඛණ්ඩව සිදුකර තිබේ.
ශ්රී ලංකා ගුවන් හමුදාව සහ අනෙකුත් අදාළ ආයතන සමඟ සම්බන්ධීකරණයෙන් මුහුදු සහ ගුවන් සම්පත්ද මෙම සෙවීම් මෙහෙයුම් සඳහා යොදාගෙන ඇත.
අනතුරට පත්වූ යාත්රාව සොයාගැනීම සහ ගොඩගැනීම සඳහා සිදුකළ සමාන්තර මෙහෙයුම්වලටද රළු මුහුදු තත්ත්වය සහ අනතුරුදායක දිය යට පරිසරය හේතුවෙන් බාධා එල්ල වී තිබේ. එම තත්ත්වයන් කිමිදුම්කරුවන් සහ යාත්රා ගොඩගැනීමේ කණ්ඩායම් සඳහා සැලකිය යුතු අවදානමක් ඇති කළ බැවින්, ආරක්ෂිතව යාත්රාවට ඇතුළු විය හැකි අවස්ථාවලදී පමණක් මෙහෙයුම් සිදුකර තිබේ.
අද සිදුකළ සොයාගැනීමත් සමඟ සෙවීම් සහ මුදාගැනීමේ අදියර අවසන් වන බව නාවික හමුදාව සඳහන් කළේය.
මින් ඉදිරියට පශ්චාත් මරණ පරීක්ෂණය, අනන්යතාව තහවුරු කිරීම සහ අනෙකුත් අවශ්ය ක්රියාමාර්ග සිදුකිරීමට නියමිතය.
මේ අතර, අනතුර සම්බන්ධයෙන් විමර්ශනය කර යාත්රාව අහිමි වීමට සහ නාවික නිලධාරියා අතුරුදන් වීමට බලපෑ හේතු හඳුනාගැනීම සඳහා විශේෂඥ කමිටුවක්ද පත්කර තිබේ.
බේරාගත් නාවිකයන් විසින් ලබාදී ඇති මූලික තොරතුරු අතර, යාත්රාව ජලය යට තිබූ යම් සුන්බුන් සමඟ ගැටෙන්නට ඇති බවට පළවූ ඉඟිද විමර්ශනයට ලක්කරමින් පවතින බව නාවික හමුදාව සඳහන් කළේය.
කෙසේ වෙතත්, මේ සම්බන්ධයෙන් මේ වන විටත් කිසිදු නිශ්චිත නිගමනයකට එළඹ නොමැති බවද නාවික හමුදාව වැඩිදුරටත් අවධාරණය කළේය.
