පාස්කු ප්‍රහාරය සම්බන්ධයෙන් සජිත් මීගමුවේදී සමාව ගනී

පාස්කු ඉරුදින ඛේදවාචකය සම්බන්ධයෙන් තමා රටෙන්  සමාව ඉල්ලන බව නව ප්‍රජාතන්ත්‍රවාදී පෙරමුණේ ජනාධිපතිධුර අපේක්ෂක සජිත් ප්‍රේමදාස මහතා මීගමුවේ පැවැති ජන රැලියක් අමතමින් කියා සිටියේය.

පාස්කු ඉරුදින ඛේදවාචකය සම්බන්ධයෙන් තමා පෞද්ගලිකවම කණගාටු වන අතර කැබිනට් ඇමතිවරයෙකු ලෙස ඒ පිළිබඳව රටෙන් දැයෙන් සමාව ඉල්ලන බවත් ඔහු එහිදී ප්‍රකාශ කළේය. මෙහිදී අදහස් දක්වමින් සජිත් ප්‍රේමදාස මහතා පවසා සිටියේ, අප්‍රේල් 21 වන දින එල්ල වු පාස්කු ප්‍රහාරය තුළින් විපතට පත් පවුල්වලට හා හානියට පත් දේවස්ථානවලට තමා පෞද්ගලිකව කණගාටුව පළ කරන බවයි. ජාතික ආරක්ෂාව අතින් ඉතා දැඩි ලෙස තීන්දු තීරණ ගෙන තමා රටේ නායකයා ලෙස කටයුතු කරන විට සිදුවන සෑම දේටම වෙන කෙනෙක් නොව තමා වගකීමක් බාර ගන්නා බව ද පැවසු සජිත් ප්‍රේමදාස මහතා, ත්‍රස්තවාදයට හා මිනීමැරුම්වලට වරදකරුවන් වු කිසිවෙකුට තමාගේ නම් කිසිදු සමාවක් නොමැති බවද පැවසීය.

අග්‍රාමාත්‍ය රනිල් වික්‍රමසිංහ මහතා රැලියට එක්වෙමින් කියා සිටියේ මේ රටට රූපවාහිනිය ලබා දුන්නේ එක්සත් ජාතික පක්ෂය බවයි. තරුණයින්ට ඩෙනිම් ඇඳීමට හැකි වුයේ ද එක්සත් ජාතික පක්ෂය නිසා යැයි පැවසු අගමැතිවරයා පරම්පරා අතර සෑම විටම යම් වෙනසක් ඇතැයි ද පැවසීය. දේශපාලනඥයෝ ඇනලොග්-තරුණයෝ ඩිජිටල් යනුවෙන් ද පැවසු ඒ මහතා තරුණයින් සමඟ වේගයෙන් ගමන් කිරීමට නම් සියලු දෙනා ඔන් ලයින් විය යුතු යැයි ද කියා සිටියේය. ඒ ගමන යෑම සඳහා සජිත් ප්‍රේමදාස මහතා අපේක්ෂකයා ලෙස ඉදිරිපත් කර ඇතැයිද අගමැතිවරයා එහිදී පැවසීය.

1 Comment

  1. Ayyyooooo kiyanna deyak natha

Leave a Reply

Your email address will not be published. Required fields are marked *