‘මහින්දට ගෝඨාට එරෙහිව බොරු කියන්න රාජිත බලපෑම් කළා‘ – හිටපු ආමි කැප්ටන්ගෙන් පැමිණිල්ලක්
මහින්ද රාජපක්ෂ මහතාට සහ ගෝඨාභය රාජපක්ෂ මහතාට එරෙහිව අමෙරිකානු තානාපතිවරයා වෙත අසත්‍ය තොරතුරු ලබා දෙන්නැයි රාජිත සේනාරත්න අමාත්‍යවරයා තමාට බලපෑම් කළ බව පවසමින් හිටපු යුද හමුදා සෙබළෙක් ඊයේ(12) අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.
2012 වසරේදී ඇවන්ට් ගාර්ඩ් මෙරිටයිම් සමාගමේ ආයුධ භාරකරු ලෙස කටයුතු කළ බව පවසන කැප්ටන් උදය දිසානායක මහතා අමාත්‍ය රාජිත සේනාරත්න මහතාට එරෙහි පැමිණිල්ල ගොනුකළේය.
මෙහිදී අදහස් දක්වමින් කැප්ටන් උදය දිසානායක මහතා පවසා සිටියේ, අතීතයේ රාජිත සේනාරත්න මහතා සමඟ සමීපව කටයුතු කළ බවයි. රාජිත අමාත්‍යවරයා ඇමෙරිකානු තානාධිපති කාර්යාලයට ගොස් අයි.එස්. එකට ගෝඨාභය මහතා ආයුධ ලබා දෙන බව පවසන ලෙස කියා සිටි බවත් සඳහන් කර සිටි අතර ඒ සියලු බොරු චෝදනා හඬ පටිගත කර ඇතැයි ද පැවසීය.
එනිසා රාජිත සේනාරත්න මහතා වහාම අත්අඩංගුවට ගන්නැයි පැවසීමට මෙලෙස පැමිණිලි කිරීමට පැමිණි බවත් කියා සිටි ඒ මහතා, සුදු වෑන් වගේ අමූලික බොරු ඔවුන් ගොතමින් සිටින බවත් ඔහු කියා සිටියේය. ඇමතිවරු පස්දෙනකුට එන්තරවාසී තමා විසින් යවා ඇතැයි ද පැවසු දිසානායක මහතා, ඔවුන්ගේ සියලු හොරකම්වල සාක්ෂි තමා ළඟ ඇති බවත් පැවසීය. අගමැතිවරයාගේ සිට සියලු දෙනාගේ හඬ පටි තමා ළඟ ඇති බවත් පැවසු ඒ මහතා, මැතිවරණය පරාජය වු පසු රාජිත සේනාරත්න මහතා ඇමෙරිකාවට යෑමට සුදානමක් ඇතැයි ද කියා සිටියේය.
තමාට ද ඒ සඳහා කථා කර ඇතැයි පැවසු ඒ මහතා, රාජිත සේනාරත්න මහතාගේ බිරිඳ සමඟ සිදුකරනු ලැබු යැයි පවසන දුරකථන සංවාදයක්ද මාධ්‍යට මුදා හැරියේය.
කැප්ටන් උදය දිසානයක : මම කැප්ටන් උදය කතා කළේ මැඩම්.ඇවන්ට් ගාඩ් එකේ
ඇමති රාජිතගේ බිරිඳ : මොනවද අපිට කරන්න පුළුවන්?
කැප්ටන් උදය දිසානයක :
ඉතිං බලන්න මැඩම් මම සර් වෙනුවෙන් සිංගප්පූරුවෙත් ගියා ඔපරේෂන් එකට මතකයිනේ මැඩම්. මගේ පුද්ගලික සල්ලි වියදම්කරලා මම සිංගප්පූරුවෙත් ගියා මැඩම් හොස්පිටල් එකටත් ගියා. මැඩම් මොකක්ද කරන්න පුළුවන්, සර්ට පොඩ්ඩක් කියනවාද මං ගැන පොඩ්ඩක් බලන්න කියලා
ඇමති රාජිතගේ බිරිඳ :
හරි හරි මං කියන්නම්කෝ. දැන් ඔළුව ගිනි අරන්නේ ඉන්නේ.
කැප්ටන් උදය දිසානයක :
දැන් කොහොමත් ඔළුව ගිනි අරන්වගේ ඉන්නේ නේද? යනුවෙන් එම සංවාදය ගොඩ නැඟිනි.
මෙවැනි පුද්ගලයින් ඇමතිවරු නොව ඇමති හොරු බවද පැවසු ඒ මහතා තමා ළඟ තබා ගෙන ඇවන්ට්ගාඩ් හිමිකරුගෙන් කප්පම් ගත් බවත් පැවසීය.
(උපුටා ගැනීම – අද දෙරණ)
