“පාක් ඇන්ඩ් රයිඩ්” (Park & Ride) නමින් නගරාශ්‍රිත සුඛෝපභෝගී බස් සේවාවක් ජනවාරි 01 වැනිදා සිට ආරම්භ කිරීමට නියමිත බව ප්‍රවාහන රාජ්‍ය ඇමැති දිලුම් අමුණුගම මහතා පවසයි. නෙල්ලිගල ජාත්‍යන්තර බෞද්ධ මධ්‍යස්ථානයේ පැවති උත්සවයකින් අනතුරුව රාජ්‍ය ඇමැතිවරයා මේ බව ප්‍රකාශ කළේය.
මාකුඹුරෙන් ආරම්භ කිරීමට බලාපොරොත්තු වන මෙම බස් සේවාව දිවයින පුරා ක්‍රියාත්මක කිරීමට බලාපොරොත්තු වන බවද ඒ මහතා වැඩිදුරටත් අදහස් දක්වමින් පවසා සිටියේය.
ජනපතිගේ උපදෙස් මත ක්‍රියාත්මක මෙම වැඩපිළිවෙළ යටතේ ජනතාවට සිය පෞද්ගලික වාහනයෙන් රථගාල වෙත පැමිණ එම වාහනය රථගාලේ නවත්වා, එතැන් සිට වායුසමනය කරන ලද සුඛෝපභෝගී බස් රථයකින් නගරය වෙත ගොස් තම අවශ්‍යතා ඉටුකර ගෙන යළි රථ ගාල වෙත පැමිණීමට හැකි ලෙස මෙම නව බස් සේවාව ක්‍රියාත්මක වන බවද ඔහු පැවසීය.
මේ වනවිට මෙම සේවාව සදහා මාකුඹුරේ සහ නාවින්නේ රථගාල් ඉදිකිරීමේ කටයුතු අවසන් කර තිබෙන බවත්, ඒ සඳහා බස්රථ ඇනවුම් කර ඇති අතර, එම බස් රථ මෙරටට පැමිණෙන තෙක් සංචාරක ප්‍රවාහනය කළ බස් රථ කුලී පදනම යටතේ ලංගම වෙත ලබා ගන්නා බවද හෙතෙම කීවේය.
වැඩි දුරටත් අදහස් දැක්වූ ඒ මහතා මෙසේ පැවසීය.
“මගීන්ට පහසුවෙන් හා ආරක්ෂිතව බස් රථයේ ගමන් කරන්න හැකි විදියට එහි ආසන පේළියක් හැර පේලියක් ඉවත් කරලා තියෙනවා. ඒ වගේම කොවිඩ් වෛරසය විනාශ වන විශේෂ රසායනිකයක් එකතු කළ තීන්ත වර්ගයක් බස් රථයේ ඇතුළත ආලේප කරනවා. ඒ වගේම මේ බස් රථවල ටිකට්පත් මිලට ගන්න ලංගම මගින් විශේෂ ඇප් එකක් හඳුන්වා දී තිබෙන නිසා මුදල් භාවිත කිරීමකින් තොරව ඊ ටිකට්පතක් මිලදී ගෙන එහි ගමන් කළ හැකියි”. යැයි අමාත්‍යවරයා පැවසීය.
