අඟහරුවාදා පැවති ගාල්ල දිස්ත්රික් විශේෂ සම්බන්ධීකරණ කමිටු රැස්වීමේදී අත්අඩංගුවට ගන්නා මත්ද්රව්යවල ඇස්තමේන්තුගත වීදි වටිනාකම ගණනය කරන ආකාරය පිළිබඳව ජනාධිපති අනුර කුමාර දිසානායක මහතා පොලිස් නිලධාරීන්ගෙන් විමසා තිබේ.
රට පුරා ක්රියාත්මක “රටම එකට” මත්ද්රව්ය විරෝධී මෙහෙයුමේ ප්රගතිය පිළිබඳව ජනාධිපතිවරයා දැනුවත් කරමින් පොලිස් නිලධාරීන් සඳහන් කළේ, 2025 ඔක්තෝබර් 30 වැනිදා ආරම්භ කළ වැඩසටහනෙන් පසු ගාල්ල දිස්ත්රික්කයෙන් අත්අඩංගුවට ගත් විවිධ මත්ද්රව්ය ප්රමාණයන් සහ ඒවායේ ඇස්තමේන්තුගත වටිනාකම් පිළිබඳවයි.
එම ඉදිරිපත් කිරීම අතරතුර ජනාධිපතිවරයා විමසා ඇත්තේ අත්අඩංගුවට ගත් මත්ද්රව්යවල මුදල් වටිනාකම තීරණය කරන්නේ කෙසේද යන්නයි.
ඊට පිළිතුරු දෙමින් පොලිස් නිලධාරීන් සඳහන් කළේ, ඒ සඳහා විවිධ ප්රදේශවල පවතින මත්ද්රව්යවල වීදි මිල ගණන් පදනම් කරගන්නා බවයි.
ප්රදේශය අනුව මිල ගණන් වෙනස් වන බවද නිලධාරීන් පෙන්වා දුන් අතර, උදාහරණයක් ලෙස හෙරොයින් ග්රෑම් 0.07ත් 0.08ත් අතර ප්රමාණයක් අඩංගු පැකට්ටුවක් ගාල්ල ප්රදේශයේදී රුපියල් 2,000කට පමණ අලෙවි වන බවත්, කොළඹ ඇතුළු අනෙකුත් ප්රදේශවල මිල ගණන් වෙනස් වන බවත් සඳහන් කළහ.
ගාල්ල දිස්ත්රික්කය තුළ මේ වන විට මත්ද්රව්ය වැටලීම් 2,607ක් සිදුකර ඇති බවත්, එහිදී මත්ද්රව්ය කිලෝග්රෑම් 119කට ආසන්න ප්රමාණයක් අත්අඩංගුවට ගෙන ඇති බවත් පොලිසිය ජනාධිපතිවරයා වෙත දැනුම් දී තිබේ.
එමෙන්ම ප්රධාන පෙළේ මත්ද්රව්ය ජාවාරම්කරුවන් 100කට අධික පිරිසකගේ වත්කම් සම්බන්ධයෙන් මේ වන විට විමර්ශන සිදුකරන බවද පොලිසිය සඳහන් කළේය.
මත්ද්රව්ය ජාවාරමෙන් උපයාගත් මුදල් යොදාගෙන මිලදී ගත් බවට සැක කෙරෙන දේපළ, වාහන සහ අනෙකුත් වත්කම් ඔවුන් ලබාගත් ආකාරය පිළිබඳව එම විමර්ශනවලදී අවධානය යොමු කර ඇති බවද නිලධාරීන් වැඩිදුරටත් පැවසීය.
