ගල් අඟුරු යුගය නිමා කරමින් ඉන්දියාවෙන් ලෝකයටම හරිත බලශක්ති පාඩමක්

ඉන්දියාවේ ආර්ථිකය සීඝ්‍රයෙන් ප්‍රසාරණය වෙමින් පවතී. 2026-27 මූල්‍ය වර්ෂයේ පළමු කාර්තුව තුළ සියයට 7.8ක දළ දේශීය නිෂ්පාදිතයේ (GDP) සැබෑ වර්ධනයක් අත්පත් කරගැනීමත් සමඟ, කර්මාන්තශාලා, ව්‍යාපාරික ස්ථාන සහ නිවෙස්වලින් විදුලිබලය සඳහා වන ඉල්ලුම අහස උසට නැගෙමින් තිබේ. මේ වසරේ මුල් භාගයේදී පමණක් එරට විදුලි ඉල්ලුම සියයට 6කින් ඉහළ ගිය අතර, මධ්‍යම විදුලිබල අධිකාරියට අනුව 2035-36 වන විට සමස්ත විදුලි ඉල්ලුම මෙගාවොට් 459,000ක් (ගිගාවොට් 459ක්) දක්වා ඉහළ යා හැකිය.

මෙම දැවැන්ත බලශක්ති පිපාසය මධ්‍යයේ, අතීතයේ ආන්තීය මට්ටමක පැවති පුනර්ජනනීය බලශක්තිය (Renewable energy) අද වන විට ඉන්දියාවේ ප්‍රධාන විදුලිබල පද්ධතියේ හදවත බවට පත්ව තිබේ. මෙය අග්‍රාමාත්‍ය නරේන්ද්‍ර මෝදි මහතා ගුජරාට් ප්‍රාන්තයේ මහඇමතිවරයාව සිටි සමයේ සිටම සූර්ය බලශක්තියට ප්‍රමුඛත්වය දෙමින් ගොඩනැගූ දිගුකාලීන උපායමාර්ගික දැක්මක සැබෑ ප්‍රතිඵලයකි.

ඩොලර් බිලියන 19ක ‘හරිත බලශක්ති කොරිඩෝව’

පුනර්ජනනීය බලශක්තිය බහුලව නිපදවන ප්‍රදේශ සහ ප්‍රධාන විදුලි පරිභෝජන මධ්‍යස්ථාන එකිනෙක සම්බන්ධ කරමින් ඉන්දියාව මේ වන විට දැවැන්ත ‘හරිත බලශක්ති කොරිඩෝවක්’ (Green Energy Corridor) නිර්මාණය කරමින් සිටියි.

මෑතකදී ප්‍රකාශයට පත් කරන ලද එහි තෙවැනි අදියර යටතේ බලශක්ති ගබඩා කිරීම් (Battery Storage) සහ සම්ප්‍රේෂණ යටිතල පහසුකම් වෙනුවෙන් අමෙරිකානු ඩොලර් බිලියන 19.3ක දැවැන්ත ආයෝජනයක් සිදුකෙරෙන අතර, එමඟින් තවත් ගිගාවොට් 135ක හරිත බලශක්ති ධාරිතාවක් ජාතික පද්ධතියට එක්කිරීමට නියමිතය.

මෙම පරිවර්තනයේ වටිනාකම පසුගිය මැයි මාසයේදී මැනවින් ඔප්පු විය. උතුරු සහ මධ්‍යම ඉන්දියාව පුරා උෂ්ණත්වය දැඩි ලෙස ඉහළ ගිය එම දිනවල, ඉන්දියාවේ උපරිම විදුලි ඉල්ලුම ගිගාවොට් 271ක පෙර නොවූ විරූ වාර්තාගත අගයකට ළඟා විය. එහෙත් එම දැවැන්ත ඉල්ලුමෙන් තුනෙන් එකක්ම කිසිදු බිඳවැටීමකින් තොරව සපුරාලීමට පුනර්ජනනීය බලශක්තිය සමත් විය. වායුසමීකරණ යන්ත්‍ර සහ විදුලි පංකා අඛණ්ඩව ක්‍රියාත්මක වෙද්දී, වසරේ දරුණුතම උණුසුම් සමය තුළ නිවාස සහ ව්‍යාපාරික ස්ථාන බාධාවකින් තොරව ආලෝකමත්ව පැවතිණි.

ඉලක්කයට වසර 5කට පෙර ළඟාවූ අසමසම ජයග්‍රහණය

මීට දශකයකට පෙර මෙවැනි අධික විදුලි ඉල්ලුමක් ඇතිවූයේ නම් ඉන්දීය විදුලි පද්ධතිය සම්පූර්ණයෙන්ම බිඳවැටීමට ඉඩ තිබිණි. එහෙත් නියමිත කාලසීමාවට වසර පහකටත් පෙර සිය පිරිසිදු බලශක්ති ඉලක්ක සපුරාගැනීමට ඉන්දියාව සමත්වීම නිසා අද වන විට එම පීඩනය පහසුවෙන් අවශෝෂණය කරගැනීමට එරටට හැකියාව ලැබී ඇත.

වර්තමානයේදී ඉන්දියාව සිය විදුලිබල අවශ්‍යතාවයෙන් ජනනය කරගන්නා හරිත බලශක්ති ප්‍රතිශතය, අමෙරිකා එක්සත් ජනපදයේ ප්‍රතිශතයට සමාන වේ. ගබඩා පහසුකම් සහිත පැය 24 පුරා ක්‍රියාත්මක හරිත විදුලි ඒකකයක් සඳහා වැයවන්නේ ඉන්දීය රුපියල් 5.2ක් පමණක් වන අතර, එය දැනට ලබාගත හැකි ලාභදායීතම නව බලශක්ති ප්‍රභවයයි.

නිවාස ලක්ෂ 21කට බිංදුවේ විදුලි බිලක් දුන් ‘සූර්ය ඝාර්’

2024 දී අගමැති මෝදි විසින් හඳුන්වා දුන් ‘ප්‍රධාන් මන්ත්‍රී සූර්ය ඝාර්’ (PM Surya Ghar) වැඩසටහන හරහා 2027 මාර්තු වන විට නිවාස මිලියන 10ක (කෝටියක) වහල මත සූර්ය පැනල සවිකිරීම ඉලක්ක කර ඇති අතර, දැනටමත් නිවාස මිලියන 6ක එම ඉලක්කය සපුරා අවසන්ය.

මෙමඟින් ජාතික විදුලිබල පද්ධතියේ විශ්වසනීයත්වය ඉහළ ගොස් ඇති අතරම, සාමාන්‍ය පවුල්වල විදුලි බිලද ශීඝ්‍රයෙන් පහත වැටී තිබේ. සූර්ය පැනල සවිකිරීමෙන් පසු අවම වශයෙන් එක් බිල්පත් වටයකදී හෝ ශුන්‍ය (රුපියල් බිංදුවේ) විදුලි බිල්පත් ලැබූ නිවාස සංඛ්‍යාව මිලියන 2.1ක් (ලක්ෂ 21ක්) ඉක්මවා ඇත!

ලොව 3 වැනි විශාලතම හරිත වෙළෙඳපොළ

පසුගිය වසර 10 තුළ ඉන්දියාවේ සූර්ය බලශක්ති ධාරිතාව විසි ගුණයකින් (20-fold) පමණ වර්ධනය වී ඇති අතර, ඒ ඔස්සේ ලොව තෙවැනි විශාලතම පුනර්ජනනීය බලශක්ති වෙළෙඳපොළ බවට ඉන්දියාව පත්ව ඇත. බ්ලූම්බර්ග් එන්.ඊ.එෆ්. (BloombergNEF) දර්ශකයේ බලශක්ති සංක්‍රාන්ති ආයෝජන සඳහා වන නැගී එන ආර්ථිකයන් අතර අඛණ්ඩව වසර තුනක්ම පෙරමුණ ගැනීමට ඉන්දියාව සමත් විය.

‘බ්ලූම්බර්ග් ෆිලැන්ත්‍රපීස්’ (Bloomberg Philanthropies) ආයතනය සමඟ එක්ව චන්ද්‍රිකා තාක්ෂණය ඔස්සේ නගර 120ක වහලවල් සිතියම්ගත කිරීම සහ කාර්මික ශිල්පීන් පුහුණු කිරීම නිසා, මීට පෙර නිවාස ලක්ෂයක සූර්ය පැනල සවිකිරීමට ගතවූ දින 118ක කාලය අද වන විට දින 06ක් දක්වා කෙටි කරගැනීමට ඉන්දියාව සමත්ව තිබේ.

රැකියා ලක්ෂ 13ක් සහ අනාගත දැක්ම

අතීතයේදී සියයට සියයක්ම පාහේ ගල් අඟුරු මත යැපුණු ඉන්දියාව, අද වන විට පිරිසිදු බලශක්ති ක්ෂේත්‍රය ඔස්සේ පමණක් රැකියා මිලියන 1.3කට (ලක්ෂ 13කට) අධික ප්‍රමාණයක් බිහිකර ඇත.

වැඩිවන බලශක්ති ඉල්ලුම, අස්ථාවර විදුලිබල පද්ධති සහ දැරිය නොහැකි විදුලි බිල හේතුවෙන් පීඩා විඳින ශ්‍රී ලංකාව ඇතුළු සංවර්ධනය වෙමින් පවතින සෙසු රටවලට, ආර්ථිකමය, උපායමාර්ගික සහ මහජන සෞඛ්‍යමය ප්‍රතිලාභ අත්කර දෙමින් සාර්ථකව ක්‍රියාත්මක කළ හැකි අගනා පෙරළිකාර මාර්ග සිතියමක් ඉන්දියාවේ මෙම හරිත බලශක්ති විප්ලවය හරහා ලොවටම කියාදෙයි.