කොවිඩ් නිසා කොම්පඤ්ඤවීදිය දුම්රිය ස්ථානයේ සේවකයන් නෑ, ප්‍රවේශපත්‍රත් නෑ
කොම්පඤ්ඤවීදිය දුම්රිය ස්ථානාධිපතිවරයාට කොවිඩ් 19 වයිරසය ආසාදනය වීමත් සමගම එහි සියලු කාර්ය මණ්ඩලය ස්වයං නිරෝධායනයට ලක් කිරීමට පියවර ගෙන ඇති අතර මේ වන විට එම දුම්රිය ස්ථානය කාර්ය මණ්ඩලයක් රහිත දුම්රිය ස්ථානයක් බවට පත්ව ඇති බවට වාර්තා වේ.
දුම්රිය දෙපාර්තමේන්තුව පවසන්නේ මේ වනවිට මෙම දුම්රිය ස්ථානයේ මගී ප්‍රවේශපත්‍ර නිකුත් කිරීමක් හෝ ප්‍රවේශ පත්‍ර පරීක්ෂා කිරීමක් සිදු නොවන බවත් එම දුම්රිය ස්ථානයෙන් දුම්රියට ගොඩවන මගීන්ට ප්‍රවේශපත්‍ර නොමැති වුවත් දඩ නියම නොකරන ලෙසට වෙනත් දුම්රිය ස්ථාන වෙත දන්වා තිබෙන බවත්ය.
මේ අතර දුම්රිය ස්ථානාධිපතිවරුන්ගේ සංගමයේ ලේකම් කසුන් චාමර පවසන්නේ දුම්රිය සාමාන්‍යාධිකාරීවරයාගේත් පාලනාධිකාරියෙත් නොසලකා හැරීම් නිසා දුම්රිය කොවිඩ් පොකුරක් නිර්මාණය වී තිබෙන බවත් මෙය දුම්රිය මගීන්ගේත් දුම්රිය සේවකයින්ගේත් ජීවිත අනතුරේ වැටීමට හේතු වී ඇති බවත්ය.
දුම්රිය දෙපාර්තමේන්තුවේ නියෝජ්‍ය සාමාන්‍යාධිකාරී (ගමනාගමන) පැවසුවේ එම දුම්රිය ස්ථානයේ වැඩ බැලීම සඳහා තාවකාලික කාර්යමණ්ඩලයක් පත් කළ යුතුව ඇතත් ඒ සඳහා කිසිවකු ඉදිරිපත් නොවන බවයි.
