සුවසැරිය ගිලන් රථ සේවකයන් කිසිවෙකුගේත් පී.සී.ආර්. පරීක්ෂණ මේ දක්වා සිදුකර නොමැති බවත්, එම තත්වය මත සුවසැරිය සේවකයින්ගේ ජීවිත අවදානමට ලක්ව ඇති බවත් සුවසැරිය සේවක සංගමයේ සභාපතිනි මයුමි ප්‍රියංගනා මහත්මිය පවසයි.
සෞඛ්‍ය අමාත්‍යාංශයේ ඉහළ නිලධාරීන් වෙත මේ බව දන්වා සිටියත් PCR පරීක්ෂණ සිදුකළහොත් මෙම සේවකයන්ගේ මානසික මට්ටම පහළ යනු ඇතැයි පවසමින් ඔවුන් එම ඉල්ලීම නොසලකා හැරිය බවත් සභාපතිනිය වැඩිදුරටත් පැවසුවාය.
ඇය පවසා සිටින්නේ මෙම සේවකයන් සඳහා නවාතැන් පහසුකම් ලබාදීමට හෝ නිසි වැඩපිළිවෙළක් අදාළ බලධාරීන් විසින් සකස් කරදී නොමැති බවත්, එවැනි පසුබිමක් මත සේවකයන් නවාතැන් ගන්නේ පොලිස් ස්ථාන, පල්ලි, කච්චේරි, පන්සල් වැනි ස්ථානවල බවත්ය. එමෙන්ම මේ සම්බන්ධයෙන් පසුගිය 24 වැනිදා මාධ්‍ය සාකච්ඡාවක් පැවැත්වූ බවත්, එදිනට පසු දිනයේම ඔවුන්ට සිය රැකියාව අහිමි වූ බවත් ඇය පවසා සිටියි.
ඇය වැඩිදුරටත් අවධාරණය කර සිටින්නේ සුවසැරිය සේවාවේ කාර්යක්ෂමතාවට උපරිම දායකත්වය සපයන සේවකයන්ට ඉතාමත් අමානුෂීය ලෙසට සලකන බවයි.
