ඉරානය සමඟ ඉක්මනින් එකඟතාවකට පැමිණිය හැකි නම් සැලසුම් කර තිබූ ප්රහාර අවලංගු කළ බව ඇමෙරිකානු ජනාධිපති ඩොනල්ඩ් ට්රම්ප් ප්රකාශ කර තිබේ.
ඔහු සිය Truth Social සමාජ මාධ්ය වේදිකාවේ පළ කළ සටහනක සඳහන් කළේ, ඉරානය සහ මැදපෙරදිග රටවල් කිහිපයක් සාකච්ඡා ඉදිරියට ගෙන යාම සඳහා හමුදා ක්රියාමාර්ග ප්රමාද කරන ලෙස ඇමෙරිකාවෙන් ඉල්ලීමක් කළ බවයි. එම තීරණය ඊශ්රායලය සමඟ සම්බන්ධීකරණයෙන් ගත් බවද ඔහු සඳහන් කළේය.
යෝජිත එකඟතාව යටතේ හෝර්මුස් සමුද්ර සන්ධිය වහාම නැවත විවෘත කිරීම සහ ඉරානයේ න්යෂ්ටික තර්ජනය අවසන් කිරීම ඇතුළත් වන බව ට්රම්ප් පැවසීය. ගිවිසුමේ මූලික රාමුව සම්බන්ධයෙන් එකඟතාවකට පැමිණ ඇති බව ඔහු ප්රකාශ කළද, එවැනි එකඟතාවක් ඇතිවූ බව ඉරානය මෙතෙක් තහවුරු කර නොමැත.
මෙම නිවේදනය නිකුත් වූයේ ඉරානයට එරෙහිව තවත් හමුදා ක්රියාමාර්ග සලකා බලමින් සිටින බවට වාර්තා පළ වූ පසුබිමකදීය.
ට්රම්ප් පැවසුවේ, ඇමෙරිකානු හමුදාව ඕනෑම අවස්ථාවක ක්රියාත්මක වීමට සූදානමින් සිටියද, රාජ්යතාන්ත්රික විසඳුමකට අවස්ථාව ලබාදීම සඳහා ප්රහාර ප්රමාද කිරීමට තීරණය කළ බවයි.
මීට පෙර ඉරානය, වොෂින්ටනය කලාපයේ උණුසුම් තත්ත්වය තවත් උග්ර කරමින් සිටින බවට චෝදනා කළ අතර, ගැටුම තවදුරටත් ව්යාප්ත වුවහොත් ඇමෙරිකාව සමඟ සහයෝගයෙන් කටයුතු කරන රටවලටද ප්රතිවිපාකවලට මුහුණදීමට සිදුවනු ඇති බවට අනතුරු ඇඟවීය.
මේ අතර, ඇමෙරිකානු රජය මැදපෙරදිග සිටින සිය පුරවැසියන්ට ආරක්ෂක නිවේදනයක් නිකුත් කරමින්, උණුසුම් තත්ත්වය තවදුරටත් උග්ර වුවහොත් ගුවන් ගමන් අවලංගු වීම, ගුවන් කලාප වසා දැමීම ඇතුළු සංචාරක බාධා ඇතිවිය හැකි බැවින් දැඩි අවධානයෙන් පසුවන ලෙස දැනුම් දී ඇත.
