පවුලේ සම්බන්ධතා කුමක් වුවත්, නීතිය සියලු දෙනාට එකසේ ක්රියාත්මක වන බව ජනාධිපති අනුර කුමාර දිසානායක මහතා පැවසීය.
රාජපක්ෂ පවුල සහ ශ්රී ලංකා පොදුජන පෙරමුණේ මූලිකත්වයෙන් අනුරාධපුරයේ පැවැත්වෙන රැලිය සම්බන්ධයෙන් අදහස් දක්වමින් ජනාධිපතිවරයා මේ බව සඳහන් කළේය.
“දැන් අඬන්නේ නැතුව, හොරකම් කරන්න එපා කියලා තාත්තා කලින්ම කියන්න තිබුණා. අම්මා වුණත්, ආච්චි වුණත් නීතිය ක්රියාත්මක වෙනවා. මහජන මුදල් හොරකම් කළ කිසිවෙකුට අපට අනුකම්පාවක් නැහැ” යනුවෙන් ජනාධිපති දිසානායක මහතා පැවසීය.
සෙනසුරාදා (12) පොළොන්නරුවේ පැවති ජාතික ජන බලවේගයේ ගොවි රැලිය අමතමින් ජනාධිපතිවරයා මෙම අදහස් පළ කළේ රාජපක්ෂ පවුල සහ දූෂණ චෝදනා සම්බන්ධයෙන් මේ වන විට සිදුවෙමින් පවතින නීතිමය ක්රියාමාර්ග පිළිබඳව අදහස් දක්වමිනි.
මේ අතර, අනුරාධපුරයේ පැවැත්වෙන ශ්රී ලංකා පොදුජන පෙරමුණේ රැලියද ජනාධිපතිවරයාගේ දැඩි විවේචනයට ලක් විය.
දූෂණ චෝදනා සම්බන්ධයෙන් අවශ්යව සිටින පුද්ගලයන් කිහිපදෙනෙකුම එම රැස්වීමට පැමිණ සිටිනු දැකිය හැකි බවට ජනාධිපතිවරයා චෝදනා කළේය.
“CID එක එතැනට ගියොත් ඒ ඔක්කොම එකම තැනකදී අල්ලගන්න පුළුවන්” යනුවෙන්ද ජනාධිපති දිසානායක මහතා පැවසීය.
අනුරාධපුරයේ පැවැත්වෙන මෙම රැලිය මහජනතාවගේ යහපත වෙනුවෙන් පවත්වන එකක් නොවන බවත්, චෝදනාවලට මුහුණ දී සිටින පුද්ගලයන් නීතියෙන් ආරක්ෂා වීමට දරන උත්සාහයක් බවත් ජනාධිපතිවරයා චෝදනා කළේය.
ජනාධිපතිවරයා මෙම අදහස් පළ කළේ හිටපු ජනාධිපති මහින්ද රාජපක්ෂ මහතා ඇතුළු පක්ෂයේ ප්රධානීන් සහ ක්රියාකාරීන් රැසකගේ සහභාගිත්වයෙන් ශ්රී ලංකා පොදුජන පෙරමුණ අනුරාධපුරයේදී දැවැන්ත දේශපාලන රැලියක් පවත්වන පසුබිමකය.
ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා මේ වන විට රක්ෂිත බන්ධනාගාරගතව සිටින අතර, ශ්රී ලංකා ගුවන් සේවයේ පුළුල් බඳ සහිත ගුවන් යානා මිලදී ගැනීමේ විමර්ශනයකට අදාළව අල්ලස් හෝ දූෂණ චෝදනා විමර්ශන කොමිෂන් සභාව (CIABOC) විසින් ඔහු අත්අඩංගුවට ගෙන තිබේ.
