සති දෙකකට ප්‍රමාණවත් භාණ්ඩ මල්ලක් ලබාදීම ඇතුළුව තවත් සහන ලබාදීමට සැලසුම් රැසක්
කොවිඩ් කාර්ය සාධක බලකාය ඊයේ රැස් වුණා. මෙම සාකච්ඡාවට එක්වෙමින් ආර්ථික පුනර්ජීවන හා දරිද්‍රතාවය තුරන් කිරීම සඳහා වන ජනාධිපති කාර්යසාධක බලකායේ සභාපති බැසිල් රාජපක්ෂ මහතා සඳහන් කලේ පවතින Covid-19 වසංගත තත්ත්වයත් සමග අත්‍යාවශ්‍ය සේවා කාර්යක්ෂමව, විධිමත්ව සහ අඛණ්ඩව පවත්වාගෙන යා යුතු බවයි.
එමෙන්ම බැරෑරුම් තත්ත්වයකදී වුවද විදුලිය, ජලය, ඉන්ධන, ගෑස්, ප්‍රවාහනය, සෞඛ්‍ය, මහාමාර්ග ඇතුළු ජනතාවට අත්‍යාවශ්‍ය සේවාවන් අඛණ්ඩව ලබාදීම සඳහා නිසි ක්‍රමවේදයක් සකස් කරන ලෙසද රාජපක්ෂ මහතා රාජ්‍ය නිලධාරින්ට මෙහිදී උපදෙස් ලබාදුන්නා.
මහජන ආධාර, විශ්‍රාම වැටුප් ඔවුන්ගේ නිවෙස්වලටම ගෙනගොස් ලබාදීමට අවශ්‍ය පියවර ගන්නා ලෙස දිස්ත්‍රික් ලේකම්වරුන්ට හා තැපැල්පතිවරයාට මෙම සාකච්ඡාවේ දී උපදෙස් ලබාදී තිබෙන අතර, නිවෙස්වලම නිරෝධායනයට යොමුකරන පවුල් සඳහා සති දෙකකට සරිලන බඩුමල්ලක් ලබාදීම සම්බන්ධයෙන් ද මෙහිදී දීර්ඝ වශයෙන් සාකච්ඡාවට ලක් කෙරුණා.
මීට අමතරව ණය වාරික සඳහා සහන කාලයක් ලබාදීම සම්බන්ධයෙන්ද මෙම සාකච්ඡාවේ දී අවධානය යොමු වී තිබෙනවා.
කොළඹ නගරය තුළ Covid-19 ශීඝ්‍රයෙන් ව්‍යාප්ත වන බැවින් එය පාලනය කිරීම සඳහා කොළඹට පැමිණෙන පිරිස පාලනය කිරීමේ ක්‍රමවේදයක් සකස් කිරීම පිළිබදවද මෙහිදී සාකච්ඡා වුණා.
