හිටපු අමාත්ය මර්වින් සිල්වා මහතාට එරෙහිව පවතින පැහැදිලි කළ නොහැකි වත්කම් සම්බන්ධ නඩුවේ සඳහන් බැංකු ගිණුමක් තමන්ට සම්බන්ධ බවට පළවන චෝදනා ප්රතික්ෂේප කරමින් රංගන ශිල්පිනී රිතු ආකර්ෂා මහත්මිය ප්රකාශයක් නිකුත් කර තිබේ.
ප්රධාන ධාරාවේ මාධ්ය සහ සමාජ මාධ්ය ඔස්සේ සංසරණය වන එම වාර්තා අසත්ය සහ නොමඟ යවන සුළු ඒවා බව ඇය පවසයි.
අල්ලස් හෝ දූෂණ චෝදනා විමර්ශනය කිරීමේ කොමිෂන් සභාව (CIABOC) විසින් හිටපු අමාත්ය මර්වින් සිල්වා මහතාට එරෙහිව පවරා ඇති නඩුවක් සම්බන්ධයෙන් පළ වූ මාධ්ය වාර්තා හමුවේ ඇය මෙම ප්රකාශය සිදුකර ඇත.
2010 මාර්තු 31 සිට 2012 මාර්තු 31 දක්වා කාලය තුළ රුපියල් මිලියන 600කට අධික වටිනාකමකින් යුත් පැහැදිලි කළ නොහැකි වත්කම් උපයාගෙන ඇති බවට සිල්වා මහතාට එරෙහිව චෝදනා එල්ල වී තිබේ. නඩු විභාගයේදී “රිතු ආකර්ෂා” යන නමින් DFCC බැංකුවේ පවත්වාගෙන ගිය ගිණුමකට මුදල් බැරවීමක් සම්බන්ධයෙන් කරුණු ඉදිරිපත් වී ඇති බවටද මාධ්ය වාර්තා කර තිබිණි.
ඊට ප්රතිචාර දක්වමින් රිතු ආකර්ෂා මහත්මිය සඳහන් කර ඇත්තේ තමන් කිසිදු අවස්ථාවක DFCC බැංකුවේ ගිණුමක් පවත්වාගෙන ගොස් නොමැති බවත්, චෝදනා පත්රයේ සඳහන් ගිණුම් අංකය තමන්ට අයත් එකක් නොවන බවත්ය.
තමන්ගේ ඉල්ලීම මත DFCC බැංකුව විසින් නිකුත් කරන ලද ලිපියක්ද ඇය ඉදිරිපත් කර ඇති අතර, එම ලිපිය මගින් තමන් එවැනි ගිණුමක් පවත්වාගෙන නොයන බව තහවුරු කර ඇති බව ඇය සඳහන් කරයි.
තවද, චෝදනා පත්රයේ සඳහන් 2010–2012 කාලසීමාවේදී තමන් පාසල් ශිෂ්යාවකව සිටි බවද රිතු ආකර්ෂා මහත්මිය පවසයි.
තමන් එම ගනුදෙනුවට සම්බන්ධ බවට සඳහන් කරමින් අන්තර්ගතයන් පළ කළ හෝ බෙදාහැරූ මාධ්ය ආයතන, සමාජ මාධ්ය වේදිකා සහ පුද්ගලයන්ට එරෙහිව දැනටමත් නීතිමය පියවර ගෙන ඇති බවද ඇය සඳහන් කර තිබේ.
එවැනි අසත්ය, විකෘති කළ හෝ නොමඟ යවන තොරතුරු තමන් එම ගනුදෙනුවට සම්බන්ධ කරමින් පළ කරන හෝ නැවත පළ කරන ඕනෑම පුද්ගලයෙකුට එරෙහිව නීතිමය පියවර ගන්නා බවටද රිතු ආකර්ෂා මහත්මිය අනතුරු අඟවා ඇත.
