රජයක් ලෙස රටේ පවතින කොවිඞ් අර්බුදයට මුහුණ දෙන ආකාරය හා ඉන් පීඩාවට පත්වන ජනතාවට ලබාදෙන සහන පිළිබඳව නිසි වැඩපිළිවෙළක් මෙවර අයවැයෙන් ඉදිරිපත් කර නැති බව විපක්‍ෂයේ ප‍්‍රධාන සංවිධායක ලක්‍ෂ්මන් කිරිඇල්ල මහතා පවසයි.
ඒ මහතා පවසන්නේ කොවිඩ් වසංගතය සමග ජනතාවට තවත් වසර දෙකක් පමණ ජීවත්වීමට සිදුවෙන බව ලෝක සෞඛ්‍ය සංවිධානය අනතුරු අගවා තිබියදීත් ඒ පිළිඹදව රජය දැඩි අවධානයක් යොමුකරමින් අයවැය ඉදිරිපත් කිරීමට පියවර ගතයුතුව තිබූ බවයි. එමෙන්ම කොවිඩ් වසංගතයට මුහුණ දීමට මීට වඩා ශක්තිමත් වැඩපිළිවෙළක් අවශ්‍ය බවද ඒ මහතා කියා සිටියා.
වැඩිදුරටත් අදහස් දක්වමින් ඒ මහතා කියා සිටින්නේ ආණ්ඩුව විසින් ලබන වසර සදහා ඉදිරිපත් කර ඇත්තේ ජනතාවට කිසිදු සහනයක් නැති පුහු අයවැයක් බවත්, යහපාලන ආණ්ඩුවේ පළමු අයවැය මගින් ලබාදුන් සහන සමග සංසන්දනය කළ විට එම අයවැයත් මෙම අයවැයත් අහසට පොළොව වැනි පරස්පරතාවයක් පවතින බවයි. එමෙන්ම යහපාලන පළමු අයවැයේදී රාජ්‍ය සේවක වැටුප් වැඩිකර, සිසු සුරක්‍ෂා ආරම්භ කර, සමෘද්ධි සහනාධාරය වැඩිකර, අත්‍යවශ්‍ය භාණ්ඩ මිල සෑහෙන ප‍්‍රමාණයකින් අඩුකර ජනතාවට විශාල සහන ප‍්‍රමාණයක් ලබාදුන් බවයි ඒ මහතා පවසා සිටින්නේ.
