මෙරට ඉදිවුණු උසම ගොඩනැගිල්ල ලෙස කොළඹ නෙළුම් කුළුණ ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් විවෘත කෙරිණි. 2012 වසරේ දෙසැම්බර් 01 දින ඉදිකිරීම් ඇරඹුණු මෙම නෙළුම් කුළුණ මීටර 350 ක උසකින් යුක්ත වන අතර චීන එක්සිම් බැංකුවේ ඩොලර් මිලියන 104 ක ණය ආධාර මත එහි ඉදිකිරීම් කටයුතු සිදුකෙරිණි. හිටපු ජනපති විපක්ෂ නායක මහින්ද රාජපක්ෂ මහතාගේ ප්‍රධානත්වයෙන් මෙහි ඉදිකිරීම් ආරම්භ කර තිබිණි.
නෙළුම් කුලුනේ ඉදිකිරීම් ඇරඹෙන්නේ 2008 වසරේදීයි. පෑලියගොඩ ඉංජිනේරු සංස්ථා වැඩබිමට අයත් හෙක්ටයාර දහයක භූමියක ශ්‍රී ලංකා විදුලි සංදේශ නියාමන කොමිසමට බහුකාර්ය විදුලි සංදේශ කුලුනක් ඉදිකිරීමට තීන්දු කර තිබූ අතර ඒ සදහා පරීක්ෂණ කටයුතු ආරම්භ විය. එම භූමියේ කුඩා දිය පොකුණක ඉහළට මතුවී තිබූ නෙළුම් මලක් දැකීමෙන් පසු යෝජිත කුලුන නෙළුම් දණ්ඩක් හා නෙළුම් මලක් ලෙස නිර්මාණය කිරීමේ අදහස ඔවුන්ට මතුවිය.එයට සියල්ලන්ගේම අනුමැතිය හිමිවී ඉන්පසු එහි සංකල්පමය සැලසුම් සියල්ල නෙළුම් දණ්ඩක් හා එහි ඉහළ කෙලවරේ වූ නෙළුම් මලක හැඩය ගන්නා ලදී. කෙසේ වෙතත් මුලින් තෝරාගත් පෑලියගොඩ ප්‍රදේශයට නෙළුම් කුලුන හිමිකර ගැනීමේ වරම් නොලැබුණු අතර එය නගරයෙහි සංචාරය කරනා කාගේත් නෙත් සිත් පැහැර ගන්නා මනරම් දසුනක් වශයෙන් කොළඹ නගරයට හිමිවිය.
නෙළුම් කුලුන ඇතුළට යන්නේ මෙහෙමයි
නෙළුම් කුළුණට ඇතුල්වීම සඳහා ඉලෙක්ට්‍රොනික ප්‍රවේශපත් ක්‍රමවේදයක් යොදා ගැනේ. එය ප්‍රවේශ ස්ථානයේ දී සලකුණු කිරීමෙන් අනතුරුව කුලුන තුළට ඇතුළු විය හැකිය. පාසල් ළමුන්ට සහන මිලකට මෙම ප්‍රවේශපත ලබා ගත හැකිවේ. ඇතුළත් වීමේ දොරටුක් 4ක් තිබේ. මෙහි බිම් මහල සාප්පු සංකීර්ණ සඳහා වෙන් කර ඇත.
වේගයෙන්ම යන විදුලි සෝපානයෙන් කුලුනේ මුදුනට
මෙහි මගීන් සඳහා විදුලි සෝපාන 3ක් වෙන් කර ඇති අතර ඒවා තත්පරයකට මීටර 7ක වේගයෙන් ධාවනය වේ. මීට අමතරව තවත් සෝපාන 2ක් තිබෙන අතර ඒවා තත්පරයට මීටර 5 ක වේගයකින් ධාවනය වේ. මෙහි ඇති මුළු විදුලි සෝපාන සංඛ්‍යාව 8 කි. මේවා ශ්‍රී ලංකාවේ වේගවත්ම විදුලි සෝපන බව කියැවේ. බිම්මහලේ සිට නෙළුම් කුළුණේ මීටර 245 ක උසින් තිබෙන නැරඹුම් මැදිරිය දක්වා කොටසට යාම සඳහා ගතවන්නේ තත්පර 40ක පමණ කාලයකි.
ශාලා පහසුකම් ගොඩයි
නෙළුම් පොහොට්ටුව කොටසේ තෙවන හා සිව්වන මහල උත්සව ශාලා දෙකකින් සමන්විත වේ. මෙහි එක් ශාලාවක පහසුවෙන් අමුත්තන් 350කට සේවා සැලසිය හැකි අතර ඒ අනුව 700 ක පිරිසකට ඉතා සුවපහසුවෙන් මෙහි අසුන්ගත හැකි වනු ඇත. ඉදිරි අනාගතයේ දී අන්තර්ජාලය හරහා මෙහි වෙන්කිරීම් සිදුකර ගත හැකිවේ. මෙහි ව්‍යාපෘති ඉංජිනේරු අනුර කුමාරපේලි මහතා පවසන්නේ මෙය කුලුනක ඇති ලොව එකම උත්සව ශාලාව බවයි.
කැරකෙන අවන්හල
නෙළුම් කුලුණේ මීටර 234 ක් ගිය පසු කැරකෙන අවන්හල (Revolving restaurant) හමුවේ. මෙහි සම්පූර්ණ වටයක් කැරකැවීම සඳහා ගතවන කාලය මිනිත්තු 90 කි.
කොළඹ වටේමයි රට වටේමයි බලන්න පුළුවන්
මෙය කිසිදු වීදුරු ආවරණයකින් ආවෘත නොවූ විවෘත නැරඹුම් ප්‍රදේශයකි.
ඇන්ටනාව
මෙය සාමාන්‍ය මහජනතාවට විවෘත නොවන කලාපයකි. විද්‍යුත් මාධ්‍ය/ සන්නිවේදන ආයතන සඳහා සම්ප්‍රේෂණ ඇන්ටනා බදු දීමක් සිදුවේ.
මේ අනුව කලකට පෙර කොළඹ විශාලතම ගොඩනැගිල්ල ලෙස නම් දැරූ පිට්ටු බම්බුව නමින් හැදින්වූ ලංකා බැංකු ගොඩනැගිල්ලද, පසුව එම ස්ථානය දිනාගත් ලෝක වෙළද මධ්‍යස්ථානයද (WTC) පරදවමින් අද කොළඹ අහස සිඹිමින් නැග සිටින්නේ නෙළුම් කුලුනයි.
අද දින ජනතා අයිතියට පත්වූ නෙළුම් කුලුන සම්පූර්ණයෙන්ම රජය සතු ගොඩනැගිල්ලක් වන අතර එය අයත් වන්නේ විදුලි සන්දේශ නියාමන කොමිෂන් සභාවටයි. මෙහි ඉදිකිරීම් පිරිවැය වන ඇමරිකන් ඩොලර් මිලියන 104.3 ක් හෙවත් රුපියල් බිලියන 12ක මුදල කුලුනෙන් ලැබෙන ආදායමෙන් ගෙවාදැමීමට නියමිතයි. නෙළුම් මල මගින් අර්ථ ගැන්වෙන්නේ ශ්‍රී ලංකා සංස්කෘතියෙහි නිර්මලත්වය, සශ්‍රීකත්වය සහ දියුණුවයි. මෙහි කුලුනේ පාදම සදහාද නෙළුම් මලක හැඩය යොදාගෙන තිබේ. නෙළුම් දණ්ඩක පැහැය ගන්නා කොළ පැහැයෙන් කුලුන වර්ණ ගන්වා ඇති අතර නෙළුම් පෙති වල රාමුව වානේ වලින්ද, එහි පෙති වීදුරු වලින්ද නිමවා ඇත. වෙනස් වන වර්ණයන්ගෙන් යුතු එල්.ඊ.ඩී. බල්බ වීදුරු පෙති සදහා සවිකොට ඇති අතර වෙසක්, අවුරුදු හා නත්තල් වැනි උත්සව කාල වලදී ඒ ඒ උත්සවයන්ට ගැලපෙන වර්ණයන්ගෙන් එම පෙති විචිත්‍රවත් කිරීමට නියමිතයි. මෙලෙස අලංකාරවත් ලෙස සකසා තිබීමත් විශේෂිතවූ ආලෝකකරණයත් නිසා රාත්‍රී කාලයේදී සැලකිය යුතු දුරක සිට නෙළුම් පොකුණ දැකගැනීමේ භාග්‍ය ජනතාවට හිමිවෙයි.
(Image- economy next)
