කොළඹ සිට අභ්‍යන්තර ගුවන් ගමන් තහනම ඉවතට
කොළඹ සිට රටේ අභ්‍යන්තර ස්ථානවලට මගීන් ප්‍රවාහනය කිරීම සඳහා රාජ්‍ය ආරක්ෂක අමාත්‍යාංශය පෞද්ගලික අංශයේ දේශීය ගුවන් සමාගම්වලට ඊයේ (16) අවසර ලබා දී තිබේ.
ආරක්ෂක හේතූන් මත වසර 25 ක් තිස්සේ ජනාකීරණ කොළඹ නගරයේ සිට අභ්‍යන්තර මගී ප්‍රවාහන ගුවන් සේවා කටයුතු තහනම් කර තිබූ අතර ඊයේ එම තහනම ඉවත් කර තිබේ.
මේ නිසා කොළඹ නගරයේ අලුතින් ඉදිකළ ගුවන්පථයේ සිට සංචාරකයින්ට අභ්‍යන්තර ගුවන් සේවා පහසුකම් සලසාගැනීමට අවස්ථාව උදාවේ.
කොළඹ නගරයේ ප්‍රමුඛ සංචාරක හෝටල්වලට සහ රාජ්‍ය ආරක්ෂක අමාත්‍යාංශය ඉදිරිපිට නව ගුවන් පථයක් ඒ සඳහාම අලුතින් ඉදිකර තිබේ. සංචාරකයින්ට එතැන් සිට මහනුවර , හම්බන්තොට , ගාල්ල , මාතර , යාපනය , සීගිරිය , ආරුගම්බේ සහ පොළොන්නරුව වැනි වැදගත් ස්ථානවලට ගුවන් ගමන් සේවා පහසුකම් ලබාගත හැකිය.
මෙතෙක් ලංකාවේ අභ්‍යන්තර ගුවන් සේවා ලබාගත හැකි වුයේ රත්මලාන ගුවන්තොටුපලේ සිට වූ අතර ඒ සඳහා කොළඹ නගරයේ සිට පැයක පමණ කාලයක් ගෙවා එහි යෑමට සිදුව තිබිණ. මෙම ගුවන් සේවා ආරම්භ කිරීමට දේශීය ගුවන් සමාගම් හතරක් ඉදිරිපත්ව තිබේ.
