‘සිලෝන් තේ ගම්මාන’ වැඩසටහන වේගවත් කිරීමට රුපියල් මිලියන 237ක අමතර ප්‍රතිපාදන
රට පුරා තේ ගම්මාන 500ක් ස්ථාපිත කිරීමේ අරමුණින් ක්‍රියාත්මක කරන ‘සිලෝන් තේ ගම්මාන’ වැඩසටහන වේගවත් කිරීම සඳහා රජය අමතර රුපියල් මිලියන 237ක මුදලක් වෙන් කර තිබේ.
මෙම තීරණය වැඩසටහනේ ක්‍රියාත්මක කිරීම සහ ව්‍යාප්තිය සමාලෝචනය කිරීම සඳහා වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහතාගේ ප්‍රධානත්වයෙන් අඟහරුවාදා (28) පැවති රැස්වීමකදී ප්‍රකාශයට පත් කරන ලදී.
ජූලි 15 වැනිදා ආරම්භ කළ මෙම ව්‍යාපෘතිය, 2030 වන විට ශ්‍රී ලංකාවේ නිෂ්පාදිත තේ ප්‍රමාණය කිලෝග්‍රෑම් මිලියන 400ක් දක්වා ඉහළ නැංවීම සහ තේ අපනයන ආදායම ඇමෙරිකානු ඩොලර් බිලියන 2.5ක් දක්වා වැඩි කිරීමේ රජයේ සැලැස්මේ කොටසකි.
වෙන් කළ අමතර මුදලින් රුපියල් මිලියන 68ක් කුඩා තේ වතු සංවර්ධන අධිකාරිය හරහා පළමු තේ ගම්මාන 144 තුළ ආදර්ශ තේ වගා බිම් ස්ථාපිත කිරීම සඳහා යොදවනු ඇත.
තවත් රුපියල් මිලියන 169ක් ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීමේ අමාත්‍යාංශය හරහා ගුණාත්මක තේ පැළ තවාන් ස්ථාපිත කිරීම සඳහා ලබා දීමට නියමිතය.
අමාත්‍යාංශය සඳහන් කළේ, මේ වන විට දිවයින පුරා තේ ගම්මාන 144ක් ආරම්භ කර ඇති බවත්, එක් එක් ගම්මානය තුළ තේ පැළ තවානක් සහ ආදර්ශ වගා බිමක් ස්ථාපිත කිරීමට අපේක්ෂා කරන බවත්ය.
වැඩසටහන අධීක්ෂණය කිරීම සඳහා ජාතික, ප්‍රාදේශීය සහ ගම් මට්ටමේ කමිටු ඇතුළත් ත්‍රි-ස්ථර කමිටු පද්ධතියක්ද අමාත්‍යාංශය විසින් හඳුන්වා දී ඇති අතර, එමගින් ව්‍යාපෘතියේ ක්‍රියාත්මක කිරීම සම්බන්ධීකරණය කිරීමට නියමිතය.
