ශ්‍රී ලංකාව මිනිස් ජාවාරමට එරෙහි ලෝක දිනය සමරයි
මිනිස් ජාවාරමට එරෙහි ලෝක දිනය නිමිත්තෙන් ශ්‍රී ලංකා රජය මිනිස් ජාවාරම මැඩලීම සඳහා ශක්තිමත් සාමූහික ක්‍රියාමාර්ග අවශ්‍ය බවත්, වින්දිතයන් ආරක්ෂා කිරීම සඳහා වැඩි අවධානයක් යොමු කළ යුතු බවත් අවධාරණය කර තිබේ.
මෙම දිනය වෙනුවෙන් නිකුත් කළ පණිවිඩයකදී ආරක්ෂක අමාත්‍යාංශයේ ලේකම් සහ ජාතික මිනිස් ජාවාරම් විරෝධී කාර්ය සාධක බලකායේ සභාපති විශ්‍රාමික එයාර් වයිස් මාර්ෂල් සම්පත් තුයාකොන්ත මහතා සඳහන් කළේ, මෙවර ගෝලීය තේමාව වන “Trapped Behind the Scam” මගින් සංවිධානාත්මක අපරාධ ජාලයන් විසින් මෙහෙයවන අන්තර්ජාල වංචා සහ මූල්‍ය වංචා සඳහා මිනිස් ජාවාරම් වින්දිතයන් වැඩි වශයෙන් භාවිත කිරීම පිළිබඳ අවධානය යොමු කරන බවයි.
අන්තර්ජාල වංචා මෙහෙයුම්වල නිරත පුද්ගලයන් ඇතැම් විට තමන් විසින්ම රැවටීමට ලක්වූ, තර්ජනයට ලක්වූ සහ බලහත්කාරයෙන් අපරාධවලට යොමු කළ මිනිස් ජාවාරම් වින්දිතයන් විය හැකි බවද ඔහු පැවසීය.
ජාතික මිනිස් ජාවාරම් විරෝධී කාර්ය සාධක බලකාය මිනිස් ජාවාරම වැළැක්වීම, වින්දිතයන් ආරක්ෂා කිරීම, විමර්ශන සහ නඩු පැවරීම් ශක්තිමත් කිරීම සහ දිවි ගලවා ගත් පුද්ගලයන් සමාජයට යළි ඒකාබද්ධ කිරීමට සහාය වීම සඳහා කැපවී සිටින බව තුයාකොන්ත මහතා සඳහන් කළේය.
මිනිස් ජාවාරමට එරෙහි සටන සඳහා සමාජයේ සියලුම අංශවල සහාය අවශ්‍ය බව අවධාරණය කළ ඔහු, මිනිස් ගෞරවය ආරක්ෂා කිරීම, වින්දිතයන්ට සහාය වීම සහ මිනිස් සූරාකෑමෙන් ලාභ ලබන අපරාධ ජාල බිඳ දැමීම සඳහා එක්ව කටයුතු කරන ලෙස ජනතාවගෙන් ඉල්ලා සිටියේය.
මිනිස් ජාවාරමට එරෙහි ලෝක දිනය සෑම වසරකම ජූලි 30 වැනිදා සමරනු ලබයි.
