විදේශ සෘජු ආයෝජන (FDI) ආකර්ෂණය කර ගැනීම සහ ප්රවර්ධනය කිරීම සඳහා නව උපායමාර්ග පිළිබඳ දැනුම හුවමාරු කර ගැනීමේ වැඩමුළුවක් ශ්රී ලංකා ආයෝජන මණ්ඩලය (BOI) සහ ඔස්ට්රේලියානු වෙළෙඳ හා ආයෝජන කොමිසම (Austrade) එක්ව පවත්වා තිබේ.
ශ්රී ලංකාව සහ ඔස්ට්රේලියාව අතර ක්රියාත්මක වෙළෙඳ හා ආයෝජන පහසුකම් සැලසීමේ ගිවිසුමේ (TIFA) ක්රියාකාරී සැලැස්ම යටතේ මෙම වැඩමුළුව සංවිධානය කර තිබේ.
ඵලදායී විදේශ සෘජු ආයෝජන ආකර්ෂණය කර ගැනීම සම්බන්ධයෙන් Austrade අනුගමනය කරන ප්රවේශය, එහි ප්රමුඛතා ක්ෂේත්ර සහ ආයෝජකයන් සමඟ සබඳතා පවත්වාගෙන යන ආකාරය පිළිබඳව මෙහිදී ප්රායෝගික දැනුම ලබා දී තිබේ.
වැඩමුළුවේ ප්රධාන දේශනය පවත්වමින් ශ්රී ලංකාවේ ඔස්ට්රේලියානු මහ කොමසාරිස් මැතිව් ඩක්වර්ත් මහතා සඳහන් කළේ ශ්රී ලංකාව සතු තරගකාරී වාසි උපරිම ලෙස ප්රයෝජනයට ගැනීමට නම් ආයෝජන ආකර්ෂණය කරගත හැකි දේශීය ප්රතිපත්තිමය පරිසරයක් නිර්මාණය කිරීම අත්යවශ්ය බවයි.
විශේෂයෙන්ම ශ්රී ලංකාවේ පුහුණු සහ දක්ෂ ශ්රම බලකාය මෙන්ම රටේ උපායමාර්ගික භූගෝලීය පිහිටීමෙන් උපරිම වටිනාකමක් ලබා ගැනීම සඳහා එවැනි පරිසරයක් අවශ්ය බවද ඔහු පෙන්වා දී තිබේ.
Austrade හි වෙළෙඳ හා ආයෝජන කොමසාරිස් ඇන්ඩෲ කාටර් මහතා විසින් වැඩමුළුව මෙහෙයවන ලද අතර, BOI සභාපති දුමින්ද හුලංගමුව මහතා පිළිගැනීමේ අදහස් දක්වමින් ආයෝජන ප්රවර්ධනය සම්බන්ධයෙන් ශ්රී ලංකාව සහ ඔස්ට්රේලියාව අතර ද්විපාර්ශ්වික සහයෝගීතාව තවදුරටත් ගැඹුරු කිරීමේ වැදගත්කම අවධාරණය කළේය.
ලොව ප්රමුඛ පෙළේ ආයෝජන ප්රවර්ධන ආයතනයක් ලෙස සැලකෙන Austrade විසින් ක්ෂේත්ර අනුව ආයෝජන ඉලක්කගත කිරීම, ආයෝජකයන් සමඟ සම්බන්ධතාවයේ විවිධ අදියර කළමනාකරණය කිරීම, රටේ ආයෝජන සන්නාමය ගොඩනැගීම සහ ඩිජිටල් තාක්ෂණය භාවිත කිරීම පිළිබඳ හොඳ භාවිතයන් මෙහිදී බෙදාගෙන තිබේ.
ආයෝජන ව්යාපෘති සඳහා ඇති අවස්ථා කළමනාකරණය කිරීම, Austrade හි ඉන්දියානු ආයෝජන කණ්ඩායම ක්රියාත්මක කළ ව්යාපෘති පිළිබඳ සිද්ධි අධ්යයන සහ ඔස්ට්රේලියානු විදේශ කටයුතු හා වෙළෙඳ දෙපාර්තමේන්තුව (DFAT) ඇතුළු රාජ්ය ආයතන අතර සම්බන්ධීකරණ ක්රමවේද පිළිබඳවද සැසි පැවැත්වී තිබේ.
මෙම වැඩමුළුව මඟින් ගුණාත්මක විදේශ ආයෝජන සමඟ කටයුතු කිරීමේ BOI ආයතනික හැකියාව තවදුරටත් ශක්තිමත් කිරීමටත්, ක්ෂේත්ර විශේෂිත ආයෝජන ප්රවර්ධනය වැඩිදියුණු කිරීමටත් අපේක්ෂා කෙරේ.
විශේෂයෙන් ශ්රී ලංකාවේ ඛනිජ සම්පත් සහ අධ්යාපන ක්ෂේත්ර සඳහා ආයෝජකයන්ට ඉදිරිපත් කළ හැකි වටිනාකම් පිළිබඳ විස්තරාත්මක යෝජනා සකස් කිරීම සඳහාද මෙම දැනුම යොදා ගැනීමට නියමිතය.
