97 වතාවක් කීවත් නොසැලකූ ත්‍රස්ත ප්‍රහාරය
මුස්ලිම් අන්තවාදී නායක සහරාන්ගේ තව්හිද් ජමාත් නමැති සංවිධානයේ ක්‍රියාකාරකම් ගැන විස්තර කර ඔවුන්ගෙන් ප්‍රහාරයක් එල්ලවිය හැකි බවට ජාතික බුද්ධි අංශය 2017 වර්ෂයේ සිට 2019 අප්‍රේල් මාසය දක්වා 97 වතාවක් පොලිස්පතිට සහ ආරක්ෂක ලේකම්ට අවවාදාත්මක දැනුම් දීම් කර ඇති නමුත් ඒ ගැන කිසිදු සැලකිල්ලක් යොමුකළේ නැති බව ජනාධිපති නීතිඥ සංජය ජයවර්ධන ඊයේ (3) ශ්‍රේෂ්ඨාධිකරණය හමුවේ කියා සිටියේය.
මුස්ලිම් අන්තවාදී කල්ලිය ළඟදීම මරාගෙන මැරෙන ප්‍රහාරයක් එල්ල කිරීමට සැලසුම් කර ඇති බව 2019 අප්‍රේල් 04 වැනිදා බුද්ධි අංශ ප්‍රධානී නිමල් ජයවර්ධන යැවූ ලියවිල්ලකින් ඉතා පැහැදිලිව දන්වා ඇති බවත් ඒ අනුව නිසි පියවර ගනු ලැබුවේ නම් 2019 අප්‍රේල් 21 වැනිදා සිදු වූ විශාල ජීවිත හා දේපොළ විනාශය වළක්වා ගත හැකිව තිබූ බවත් ඔහු අනාවරණය කළේය.
ජනාධිපති නීතිඥ ජයවර්ධන එසේ පැවසුවේ 2019 අප්‍රේල් 21 වැනිදා සිදු වූ මරාගෙන මැරෙන බෝම්බ ප්‍රහාරය වැළැක්වීමට නිසි පියවර නොගැනීම ගැන රජයට හා ආරක්ෂක අංශ ප්‍රධානීන්ට එරෙහිව මූලික අයිතිවාසිකම් පෙත්සමක් ගොනු කළ ශ්‍රී ලංකා නීතිඥ සංගමය වෙනුවෙන් ශ්‍රේෂ්ඨාධිකරණය හමුවේ කරුණු දක්වමිනි.
හිටපු පොලිස්පති පූජිත ජයසුන්දර සහ හිටපු ආරක්ෂක ලේකම් හේමසිරි ප්‍රනාන්දු නිල වශයෙන් ඔවුන්ට පැවරී තිබූ රාජකාරිය ඉටුකර නැති බවත් සහරාන්ගේ අන්තවාදී කල්ලියේ ක්‍රියාකාරකම් ගැන 2016 වර්ෂයේ සිටම බුද්ධි අංශවල නිරීක්ෂණයට ලක්වී ඇති බවත් එහිදී ප්‍රකාශ විය. ඒ පිළිබඳ තොරතුරු විටින් විට ඒ නිලධාරින්ට දන්වා තිබෙන බවට සාක්ෂි මේ වන විටත් දිවුරුම් පෙත්සම් මගින් ශ්‍රේෂ්ඨාධිකරණයට ඉදිරිපත් වී තිබෙන අතර එනිසා ආරක්ෂක පියවර නොගැනීම ගැන ඒ දෙදෙනා ප්‍රධාන වශයෙන් වගකිව යුතු බවත් ජනාධිපති නීතිඥ සංජය ජයවර්ධන මහතා ප්‍රකාශ කර සිටියේය.
“2019 අප්‍රේල් 21 වැනිදා පෙරවරු 8.00 පමණ මුලින්ම මරාගෙන මැරෙන බෝම්බ ප්‍රහාරය එල්ල වුණාට පසුව වහාම ආරක්ෂක පියවර කිසිවක් ගෙන නැහැ. වාසනාවට තවත් ප්‍රහාර එල්ල වූයේ නැහැ. හදිසි නීතිය යටතේ ඇඳිරි නීතිය පැනවූවා හැර වෙන කිසිදු පියවරක් ගත්තේ නැහැ. 2016 වර්ෂයේ සිට මේ ත්‍රස්ත සංවිධානයේ තොරතුරු ලැබුණත් කිසිවෙක් අත්අඩංගුවට ගත්තේ නැහැ. අවි ආයුධ පුපුරන ද්‍රව්‍ය සමග අත්අඩංගුවට ගෙන සිටි අයත් නඩුවක් නැතිව නිදහස් කර හැරලා” යැයි ද ඔහු වැඩිදුරටත් සාක්කි ලබාදෙමින් කියා සිටියේය.
