නිදහස් අධ්‍යාපනය ක්‍රියාත්මක වුවත් නිදහස් අධ්‍යාපනය වෙනුවෙන් වෙන් කරන මුදල ප‍්‍රමාණවත් නොවන බව ශ්‍රී ලංකා පොදුජන පෙරමුණේ ජනාධිපති අපේක්ෂක හිටපු ආරක්ෂක ලේකම් ගෝඨාභය රාජපක්ෂ මහතා පවසයි. ඒ මහතා මේ බව පැවසූවේ ජාතික පෙරපාසල් ගුරු වෘත්තීය ජාතික සම්මේලනය අද(1) කොළඹ ප්‍රදර්ශන හා සම්මේලන ශාලාවේදී පැවැති අවස්ථාවට එක්වෙමිනි.
අධ්‍යාපන ක්ෂේත‍්‍රයේ ඉහළට යන්න අපේ දරුවන්ට අවස්ථාව ලබා දෙන්නේ නැත්නම් අපිට ඉදිරි ආර්ථික සැළැස්මක් ගැන කතා කිරීමේ හැකියාවක් නොමැති බවත් 21 වෙනි ශත වර්ෂය දැනුම හා ඥානය මුල් කරගත් ශත වර්ෂයක් බවත් දැනුම හා ඥානය කෙරෙහි අවධානය යොමු නොකර රැකියා උත්පාදනය කළ නොහැකි බවත් ඒ මහතා පෙන්වා දුන්නේය.
මේ නිසා අධ්‍යාපනය යනු රටක ජාතියක පැවැත්මට වඩාම වැදගත්වන ක්ෂේත‍්‍රයක් වන බැවින් අපේ දරුවන්ට පළමුවෙන්ම අයන්න කියලා දෙන පෙර පාසලේ අධ්‍යාපනයත් එම ආකාරයෙන්ම වැදගත් බවද ගෝඨාභය රාජපක්ෂ මහතා ප්‍රකාශ කළේය.
අධ්‍යාපනයට විශාල ආයෝජනයක වෙන් කළ යුතු බවත් එමෙන්ම පෙර පාසල් සංවර්ධනය සඳහාත් අවධානය යොමු කළ යුතු බවත් ගෝඨාභය රාජපක්ෂ මහතා පවසයි.
“දැනටත් අපේ සමහර අඩු ආදායම් ලබන පවුල්වල දරුවන් පෙර පාසල් අධ්‍යාපනයට යොමු වීමේ ප‍්‍රවණතාවය අඩුයි. පෙර පාසල් අධ්‍යාපනයේ වැදගත්කම දෙමව්පියන්ට අවබෝධ කරවිම සදහාත් වැඩපිළිවෙලක් අවශ්‍යයි. විශේෂයෙන් අඩු ආදායම් ලබන පවුල්වල දරුවන්ට පෙර පාසල් අධ්‍යාපනය සඳහා වූ ශිෂ්‍යත්ව ක‍්‍රමයක් ඇති කිරීම සම්බන්ධයෙනුත් අපේ අවධානය යොමු වී තිබෙනවා.“ යැයිද ඒ මහතා කියා සිටියේය.
ඒ වගේම පෙරපාසල් ගුරුවරියන්ගේ දැනුම වැඩිකර ගැනීමට අවස්ථාව සලසන බවත් මෙවැනි වෘත්තීය සමිතියක් කි‍්‍රයාත්මක වීම මගින් පෙර පාසල් ගුරුවරියන්ගේ අදහස් හා යෝජනා සාකච්ඡා කර පෙර පාසල් විධිමත් කිරීමේ අවස්ථාව හිමි වන බවත් ගෝඨාභය මහතා පෙන්වා දුන්නේය.
“බොහෝ වෘත්තීන් පහත් කොට සලකන මානසිකත්වයක් අපේ සමාජයේ පවතිනවා. පෙර පාසල් අධ්‍යාපනයේ සිට මේ තත්ත්වයන් වෙනස් කිරීමේ වගකීම පවතින්නේ ඔබ මතයි.“ යනුවෙන්ද ඒ මහතා සඳහන් කර සිටියේය.
(Image – facebook )
