සීමාසහිත පර්පෙචුවල් ට්‍රෙෂරීස් සමාගමේ ව්‍යාපාර අත්හිටුවීම තවදුරටත් දීර්ඝ කරයි.
පර්පෙචුවල් ට්‍රෙෂරීස් ලිමිටඩ් (PTL) හි ප්‍රාථමික අලෙවිකරුවෙකුගේ ව්‍යාපාර සහ ක්‍රියාකාරකම් කරගෙන යාම අත්හිටුවීම තවත් මාස හයක කාලයක් සඳහා දීර්ඝ කිරීමට ශ්‍රී ලංකා මහ බැංකුව තීරණය කර ඇත.
මහ බැංකුවේ මුදල් මණ්ඩලය විසින් ගනු ලැබූ තීරණය ඊයේ (05) පස්වරු 4.30 සිට ක්‍රියාත්මක වේ.
ලියාපදිංචි කොටස් හා සුරැකුම්පත් ආඥාපනත සහ දේශීය භාණ්ඩාගාර බිල්පත් ආඥාපනත යටතේ ඇති කරන ලද රෙගුලාසිවලට අනුව මෙම අත්හිටුවීම ආරම්භ කර ඇත.
ශ්‍රී ලංකා මහ බැංකුව විසින් සිදුකරන පරීක්ෂණ අඛණ්ඩව පවත්වාගෙන යාම සඳහා මෙම තීරණය ගෙන තිබේ.
පර්පෙචුවල් ට්‍රෙෂරීස් සමාගම ප්‍රථම වරට 2017 ජූලි 6 වන දින ප්‍රාථමික අලෙවිකරුවෙකු ලෙස ව්‍යාපාර කටයුතු කරගෙන යාම අත්හිටුවන ලද අතර එතැන් සිට සෑම මාස හයකට වරක් එම අත්හිටුවීම දීර්ඝ කර ඇත.
