ශ්‍රී ලංකාවේ මූල්‍ය පද්ධතිය ශක්තිමත් කිරීම සහ ආයෝජන පුළුල් කිරීම පිළිබඳව ජාත්‍යන්තර මූල්‍ය සංස්ථාව (IFC) සහ රජය අතර විශේෂ සාකච්ඡාවක්
ශ්‍රී ලංකාවේ මූල්‍ය ක්ෂේත්‍රය ශක්තිමත් කිරීම සහ රට තුළ තිරසාර ආර්ථික වර්ධනයක් ප්‍රවර්ධනය කිරීමේ අරමුණින්, ලෝක බැංකු සමූහයට අයත් ජාත්‍යන්තර මූල්‍ය සංස්ථාවේ (IFC) කලාපීය උප සභාපති සර්වේෂ් සූරි (Sarvesh Suri) මහතාගේ ප්‍රධානත්වයෙන් යුත් ඉහළ පෙළේ දූත පිරිසක් සහ කම්කරු අමාත්‍ය මෙන්ම මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු මහතා අතර විශේෂ සාකච්ඡාවක් පැවැත්විණි.
පසුගිය ඔක්තෝබර් 30 වැනිදා මුදල් අමාත්‍යාංශ පරිශ්‍රයේදී මෙම සාකච්ඡාව පැවති අතර, මෙරට මූල්‍ය පද්ධතියේ ස්ථායීතාව තහවුරු කිරීම සහ සියල්ලන් ඇතුළත් ආර්ථික සංවර්ධනයක් (Inclusive economic development) සාක්ෂාත් කරගැනීම උදෙසා ජාත්‍යන්තර මූල්‍ය සංස්ථාවෙන් ලබාගත හැකි තාක්ෂණික හා මූල්‍ය සහයෝගීතාවන් පිළිබඳව මෙහිදී දෙපාර්ශ්වයේ පුළුල් අවධානය යොමු විය.
ප්‍රමුඛ සංවර්ධන ව්‍යාපෘති සඳහා ආයෝජන
විශේෂයෙන්ම ශ්‍රී ලංකාවේ උපායමාර්ගික සංවර්ධන ක්ෂේත්‍රයන් වන කෘෂිකර්මාන්තය, ධීවර කර්මාන්තය, සංචාරක ව්‍යාපාරය මෙන්ම ප්‍රවාහන හා සැපයුම් ජාල (Logistics) වැනි ප්‍රමුඛ අංශයන් වෙනුවෙන් IFC ආයෝජන සහ මූල්‍ය පහසුකම් ලබාගැනීමේ ඇති විභවතාවන් පිළිබඳව මෙහිදී දීර්ඝ ලෙස සාකච්ඡා කෙරිණි.
රටේ පුළුල් සංවර්ධන ප්‍රමුඛතාවන්ට අනුගත වන පරිදි, සාම්ප්‍රදායික බැංකු ණය ක්‍රමවේදයන්ගෙන් ඔබ්බට ගිය නව්‍ය මූල්‍යකරණ යාන්ත්‍රණයන් (Alternative financing mechanisms) මෙරට තුළ ස්ථාපිත කිරීමේ වැදගත්කමද නියෝජ්‍ය අමාත්‍යවරයා ඇතුළු නියෝජිතයින් මෙහිදී පෙන්වා දුන්හ.
ශ්‍රී ලංකාව තුළ නව ආයෝජන අවස්ථා පුළුල් කිරීම, මූල්‍ය අංශයේ කාර්යක්ෂමතාව ඉහළ නැංවීම සහ දිගුකාලීන ආර්ථික ස්ථාවරත්වය ගොඩනැගීම සඳහා ජාත්‍යන්තර මූල්‍ය සංස්ථාව (IFC) සමඟ පවතින සබඳතා තවදුරටත් ශක්තිමත් කරගැනීමට දෙපාර්ශ්වයම සිය කැපවීම පළ කළහ.
මෙම සාකච්ඡාව සඳහා ජාත්‍යන්තර මූල්‍ය සංස්ථාවේ (IFC) කලාපීය අධ්‍යක්ෂ මැනුවෙල් රෙයෙස් රෙටානා (Manuel Reyes Retana) සහ ශ්‍රී ලංකාව හා මාලදිවයින සඳහා ලෝක බැංකු සමූහයේ මෙරට කළමනාකාර ඩේවිඩ් සිස්ලන් (David Sislen) යන මහත්වරුන් ඇතුළු ජ්‍යෙෂ්ඨ නිලධාරීන් පිරිසක් එක්ව සිටියහ.
