රටේ බන්ධනාගාර පද්ධතිය නිසි ලෙස පාලනය කිරීමට රජයට නොහැකි වීම, ජනතාවගේ අවශ්යතා සපුරාලීමට එහි හැකියාව පිළිබඳ බරපතළ ගැටලු මතු කරන බව විපක්ෂ නායක සජිත් ප්රේමදාස මහතා පවසයි.
බොරැල්ල මාලිගාකන්ද ප්රදේශයේ පැවති ජන හමුවකට එක්වෙමින් ප්රේමදාස මහතා සඳහන් කළේ, විශේෂඥ කණ්ඩායමක් සමඟ රට පාලනය කරන බවට පොරොන්දු වූ රජය, පාලන ක්ෂේත්රයේ වැදගත් අංශ කිහිපයකදීම අසාර්ථක වී ඇති බවයි.
විදේශ ණය ගෙවීමකට අදාළව සිදුවූ බව කියන සයිබර් ප්රහාරය සම්බන්ධයෙන්ද අදහස් දක්වමින් ඔහු චෝදනා කළේ, මහජන මුදල් ආරක්ෂා කිරීමට රජය නිසි ක්රියාමාර්ග ගෙන නොමැති බවයි.
ණය ගෙවීම් නිසි ලෙස කළමනාකරණය කිරීමට හෝ බන්ධනාගාර තුළ නීතිය හා සාමය පවත්වා ගැනීමට නොහැකි පාලනයකට රටේ පුළුල් ගැටලු විසඳිය හැක්කේ කෙසේදැයි ඔහු ප්රශ්න කළේය.
යුක්තිය හා බන්ධනාගාර අමාත්යවරයාට එරෙහි විශ්වාසභංග යෝජනාව පාර්ලිමේන්තුවේදී පරාජය කර දින කිහිපයකට පසු මහර බන්ධනාගාරයේ නොසන්සුන් තත්ත්වයක් ඇති වූ බව සිහිපත් කළ ප්රේමදාස මහතා, එම අවස්ථාවේ අමාත්යවරයා වෙනුවෙන් පෙනී සිටි රජය මේ වන විට එම බන්ධනාගාරය සම්බන්ධයෙන්ම තවත් අර්බුදයකට මුහුණ දී ඇති බව පැවසීය.
සිරගෙයක් පාලනය කිරීමට නොහැකි රජයකට රට නැවත ගොඩනැගීමට හැකි වේ යැයි අපේක්ෂා කළ නොහැකි බවත්, වත්මන් පාලනය ගැටලු විසඳනවා වෙනුවට රට වැරදි දිශාවකට ගෙන යමින් සිටින බවත් විපක්ෂ නායකවරයා සඳහන් කළේය.
එමෙන්ම, රටේ ජනගහනයෙන් සියයට 30ත් 40ත් අතර ප්රමාණයක් දරිද්රතාවයට පත්ව ඇති බවටද ඔහු චෝදනා කළ අතර, නාගරික, ග්රාමීය සහ වතු ප්රජාවන් විශාල සංඛ්යාවක් ආර්ථික අපහසුතාවලට මුහුණ දී සිටින බව පැවසීය.
