වෙසක් පුර පසළොස්වක පොහොය අදයි

වෙසක් පුර පසළොස්වක පොහොය දිනය අදට යෙදී තිබේ.

ලොව්තුරු අමාමෑණි බුදු පියාණන්වහන්සේගේ තෙමඟුල අද වැනි වෙසක් පොහොය දිනක සිදුවීම ලෝක වාසි බෞද්ධ ජනතාව සමරනු ලබයි.

ආමිෂ හා ප්‍රතිපත්ති පූජාවන්ට මුල්තැන දෙමින් ලෝකවාසි බෞද්ධ ජනතාව වෙසක් දිනය සමරන්නේ මහත් බැතියෙනි.සිද්ධර්ථ කුමරුගේ උපත, බෝධිසත්වයන් වහන්සේගේ බුදුවීම හා පිරිනිවන් පෑම වෙසක් දින සිදු වූ සුවිශේෂී සිදුවීමයි.

බුදු හිමියෝ බුද්ධත්වයෙන් අටවන වර්ෂයේ මණිඅක්ඛිත නා රජුගේ ආරාධනයෙන් කැලණියට වැඩම කරවන ලද්දේ වෙසක් ‍පොහෝ දිනකය. එම ගමනේදී සමනළ කඳු මුදුනට වැඩම කළ බුදු හිමියෝ සිරිපා සටහන එහි තැබූ අතර එය සිහිපත් කරමින් කෙරෙන සිරිපා සමය නිමවන්නේද වෙසක් පුර පසළොස්වක ‍පොහෝ දිනක වීම විශේෂත්වයයි.

විජය කුමරුගේ පැමිණීම, දුටුගැමුණු රජු විසින් රුවන්වැලි සෑය ඉදිකිරීම ආරම්භ කිරීමද වෙසක් පුර පසළොස්වක ‍පෝ දිනක සිදුවූ බව කියැවෙයි. බුදු හිමියන්ගේ ධර්ම භාණ්ඩාගාරික ලෙස සැලකෙන ආනන්ද හිමියන් අපවත් වන්නේ ද වෙසක් ‍පෝ දිනකය.

වෙනත් වර්ෂ මෙන් නොව, ලෝකයම වෙලාගත් කොවිඩ්-19 වසංගත තත්ත්වය හේතුවෙන් දිවයිනේ ද මේ මොහොත වන විට සංචරණ සීමා පනවා තිබෙන බැවින් මෙවර වෙසක් පෝය නිමිත්තෙන් සිදු කරනු ලබන ආමිෂ සහ ප්‍රතිපත්ති පූජාවන් නිවසේ සිටම සිදු කිරීමට සෞඛ්‍ය අංශ විසින් උපදෙස් ලබාදී ඇත. ඒ අනුව මෙවර වෙසක් දින සැමරුම සෞඛ්‍ය ආරක්ෂාවට මුල්තැන දෙමින් සැමරීමට ලක් වාසී බෞද්ධ ජනතාවට සිදුව තිබේ.

Leave a Reply

Your email address will not be published. Required fields are marked *