සම්පූර්ණ රුධිර ගණනය (Full Blood Count – FBC) පරීක්ෂණයක් සඳහා රජය අනුමත කළ උපරිම ගාස්තුව ඉක්මවා මුදල් අයකිරීමේ චෝදනාවට වව්නියාවේ පෞද්ගලික රෝහලකට වව්නියාව මහෙස්ත්රාත් අධිකරණය රු. 500,000ක දඩයක් නියම කර තිබේ.
පාරිභෝගික කටයුතු පිළිබඳ අධිකාරී පනත යටතේ නිකුත් කළ අංක 67 දරන නියෝගය අනුව, පාරිභෝගික කටයුතු පිළිබඳ අධිකාරියේ (CAA) වව්නියාව දිස්ත්රික් විමර්ශන නිලධාරීන් විසින් මෙම නඩුව ගොනු කර තිබුණි.
CAA සඳහන් කළේ, ජූලි 14 වැනිදා සිදුකළ විශේෂ වැටලීමකදී වව්නියාව රෝහල් මාර්ගයේ පිහිටි මෙම පෞද්ගලික රෝහල FBC රුධිර පරීක්ෂණයක් සඳහා රු. 550ක් අයකර ඇති බව අනාවරණය වූ අතර, එය රජය නියම කර ඇති රු. 400ක උපරිම ගාස්තුව ඉක්මවා යන බවයි.
අදාළ නඩුව ජූලි 28 වැනිදා වව්නියාව මහෙස්ත්රාත් අධිකරණයේදී කැඳවූ අතර, ඉදිරිපත් කළ කරුණු සලකා බැලීමෙන් අනතුරුව රෝහලට රු. 500,000ක දඩයක් නියම කිරීමට අධිකරණය කටයුතු කළේය.
රජය නියම කර ඇති උපරිම ගාස්තුව ඉක්මවා මුදල් අයකරන පෞද්ගලික රෝහල් හෝ වෛද්ය රසායනාගාර පිළිබඳ තොරතුරු කාර්යාල වේලාවන් තුළ 1977 දුරකථන අංකය ඔස්සේ පාරිභෝගික කටයුතු පිළිබඳ අධිකාරියට දැනුම් දෙන ලෙස එම අධිකාරිය ජනතාවගෙන් ඉල්ලීමක් කර තිබේ.
