අප්‍රේල් 30 වැනිදා ඇල්පිටිය පිටිගල මාපලගම ප්‍රධාන මාර්ගයේ නියාගම ප්‍රාදේශීය ලේකම් කාර්යාලය අසලදී සිදුවූ රිය අනතුරකින් 32 හැවිරිදි කාන්තාවක් මිය ගියාය.
පසුගියදා ඇයගේ සැමියා අත්අඩංගුවට ගනු ලැබුවේ අනතුර සිදුකිරීමට ඔහුගේ මිතුරෙකුට ඒත්තු ගැන්වීමේ චෝදනාව මතයි.
අනතුර සිදු කිරීම සඳහා සැකකරු රුපියල් ලක්ෂ 20ක මුදලක් තම මිතුරාට පොරොන්දු වී ඇතැයි පොලිසිය කියයි.
වින්දිත කාන්තාව කලක් විදේශ රැකියාවක නියැලීමෙන් පසු නැවත ශ්‍රී ලංකාවට පැමිණ ඇති අතර ඇයගේ නමට රුපියල් ලක්ෂ 50ක ජීවිත රක්ෂණ ඔප්පු හතරක් තිබී ඇත.
රක්ෂණ මුදල ලබාගැනීම සඳහා සැකකරු සිය මිතුරා සමඟ එක්ව මෙම අනතුර සැලසුම් කර ඇත.
අනතුරට ලක්වූ තරුණිය යතුරුපැදියකින් කටයුත්තකට සම්බන්ධ වීමට ගිය තම ඥාතිවරියක් එනතුරු පාරේ බලා සිටියදී ලොරි රථයකට යටවී ඇත.
ඇය අසාධ්‍ය තත්ත්වයෙන් රෝහල් ගත කර ඇති අතර පසුව ඇයගේ තුවාල හේතුවෙන් මිය ගියාය.
සැකකරුගේ මිතුරා යැයි සැලකෙන ලොරි රථ රියදුරු එම ස්ථානයෙන් පලාගොස් ඇති අතර ඔහු සොයා මේ වනවිට පොලිසිය පරීක්ෂණ පවත්වයි.
