මෙටා සමාගමේ ගෝලීය කටයුතු පිළිබඳ ප්රධාන නිලධාරී ජොයෙල් කැප්ලාන්, ඉන්දීය අග්රාමාත්ය නරේන්ද්ර මෝදි විසින් පළ කළ වීඩියෝවක් ෆේස්බුක් සහ ඉන්ස්ටග්රෑම් සමාජ මාධ්ය වේදිකාවල තාවකාලිකව සීමා කිරීම සම්බන්ධයෙන් ඉන්දීය තොරතුරු තාක්ෂණ අමාත්ය අශ්විනී වෛෂ්ණව්ගෙන් සමාව ඉල්ලා තිබේ.
ජ්යෙෂ්ඨ ඉන්දීය රජයේ නිලධාරීන් සමඟ පැවති සාකච්ඡාවකදී කැප්ලාන් මෙටා සමාගම වෙනුවෙන් සමාව ඉල්ලා ඇති අතර, මෙම සීමා කිරීම දෝෂයක් හේතුවෙන් සිදුවූවක් බව පවසා තිබේ. මෙටා සමාගමේ ජ්යෙෂ්ඨ නිලධාරීන් ඉන්දීය ඉලෙක්ට්රොනික හා තොරතුරු තාක්ෂණ අමාත්යාංශයේ (MeitY) නිලධාරීන් සමඟ ද විනාඩි 45ක පමණ සාකච්ඡාවක් පවත්වා තිබේ.
මෝදි විසින් ජූලි 23 වැනිදා පළ කළ මෙම වීඩියෝව මෙටා සමාගමට අයත් ෆේස්බුක් සහ ඉන්ස්ටග්රෑම් වේදිකාවලින් කෙටි වේලාවකට ඉවත් කර තිබූ අතර පසුව එය යළි පළ කර තිබිණි. මෙටා සමාගම එය තාක්ෂණික දෝෂයක් හේතුවෙන් සිදුවූ බව පැවසුවද, ඉන්දීය ඉලෙක්ට්රොනික හා තොරතුරු තාක්ෂණ අමාත්යාංශය එම පැහැදිලි කිරීම ප්රමාණවත් නොවන බව පවසා තිබිණි.
සන්නිවේදන හා තොරතුරු තාක්ෂණය පිළිබඳ පාර්ලිමේන්තු ස්ථාවර කාරක සභාවේ සභාපතිවරයා වන භාරතීය ජනතා පක්ෂයේ (BJP) මන්ත්රී නිශිකාන්ත් දුබේ පැවසුවේ මෙම සිද්ධිය සම්බන්ධයෙන් කාරක සභාව මෙටා සමාගම වගකිව යුතු බවට තීරණය කර ඇති බවයි. අග්රාමාත්යවරයාගේ වීඩියෝව ඉවත් කිරීම හුදෙක් අතරමැදි සේවා සපයන්නෙකු ලෙස නොව, ප්රකාශකයෙකු ලෙස මෙටා සමාගම ක්රියා කිරීමක් බව ඔහු පෙන්වා දී ඇති අතර, මෙටා ප්රධාන විධායක නිලධාරී මාර්ක් සකර්බර්ග් සමාව ඉල්ලා සිටිය යුතු බවද ප්රකාශ කර තිබේ.
භාවිතා කරන්නන් සංඛ්යාව අනුව ඉන්දියාව මෙටා සමාගමේ විශාලතම වෙළෙඳපොළ වන අතර, මිලියන සිය ගණනක් පිරිසක් ෆේස්බුක්, ඉන්ස්ටග්රෑම් සහ වට්ස්ඇප් භාවිත කරති.
පාර්ලිමේන්තු ස්ථාවර කාරක සභාවලට රජයේ ප්රතිපත්ති සම්බන්ධයෙන් විමර්ශනය කිරීමට මෙන්ම නිලධාරීන් සහ සමාගම් ප්රධානීන් කැඳවා කරුණු විමසීමට හැකියාව තිබේ. කෙසේ වෙතත්, එම කාරක සභාවලට ස්වාධීනව දඩ පැනවීමට, නීතිමය ආරක්ෂාවන් ඉවත් කිරීමට හෝ නඩු පැවරීමට නියෝග කිරීමට බලයක් නොමැත. අන්තර්ජාල වේදිකාවකට එරෙහිව යම් ක්රියාමාර්ගයක් ගැනීමට නම්, එය පවතින නීතිය යටතේ රජය හෝ අධිකරණය විසින් සිදු කළ යුතුය.
