මෙරට දෙවැනි කොවිඩ් රැල්ල ගැන නවතම අනාවරණයක්
මෙරට දෙවැනි කොවිඩ් රැල්ල ලෙසට සැලකිය හැකි බ්‍රැන්ඩික්ස් පොකුරේ මුල නිර්මාණය වී ඇත්තේ තුර්කියේ සිට මෙරටට පැමිණි යුක්‍රේන ගුවන් කාර්ය මණ්ඩලයකින් බවට බුද්ධි අංශ අනාවරණය කරගෙන තිබේ.
මෙම යුක්‍රේන කාර්ය මණ්ඩලය ඉකුත් සැප්තැම්බර් මස 11 වැනිදා මෙරටට පැමිණ ඇති අතර එම පිරිසට අයත් එකොළොස්දෙනා සීදුවේ පිහිටි තරු හෝටලයක ස්වයං නිරෝධායනයට ලක් වී ඇත. ඒ අතර ගුවන් කාර්ය මණ්ඩලයේ නිරෝධානය වූ යුක්ක්‍රේන් ජාතිකයකු සැප්තැම්බර් 13 වැනිදා කොවිඩ් ආසාදිතයකු ලෙස වාර්තා වී අයි.ඩී.එච්. රෝහලට ඇතුළත් කර තිබේ. ඒ අනුව රෝහල් කාර්ය මණ්ඩලය හා සෙසු ගුවන් කාර්ය මණ්ඩලයට පී.සී.ආර්. පරීක්ෂණ සිදු කර ඇත.
මෙම පිරිස නිරෝධායනයට ලක් වූ හෝටල් කාර්ය මණ්ඩලයේ හැට දෙනාගෙන් දහඅට දෙනකුම දිනපතා නිවෙස්වලට ගොස් සේවයට පැමිණි අය වූ අතර එම 18 දෙනා සැප්තැම්බර් 11 වැනිදා සිට 13 වැනිදා දක්වා සිය නිවෙස්වල සිට සේවයට වාර්තා කර ඇති බවට අනාවරණය වී තිබේ. හෝටල් කාර්ය මණ්ඩලයද දින දාහතරක් නිරෝධායනය කළ යුතු වුවත් හෝටල් පරිපාලනය කොවිඩ් නීති නොතකා මෙම සේවකයන් පිරිසට නිවෙස්වලට යෑමට ඉඩ සලසා තිබේ.
අනතුරුව නිවෙස්වලට දිනපතා ගිය පිරිසෙන් පස්දෙනකුට කොවිඩ් ආසාදනය වී ඇති බවට තහවුරු වී ඇති අතර, ඉන් තිදෙනක් සැප්තැම්බර් 11 වැනිදා සිට 13 වැනිදා දක්වා සේවය කළ අය වෙති. හෝටලයේ කෝකියා හා ලොන්ඩරි භාර නිලධාරියාද එම පිරිසට අයත් බවට වාර්තා වේ. මීට අමතරව අදාළ හෝටලේ සේවකයකු හලාවත සිට දිනපතා පොදු ප්‍රවාහන සේවා ඔස්සේ සීදුවට පැමිණ ඇති බවටද හෙළි වී තිබේ.
මෙම විමර්ශන වලට සම්බන්ධ වූ ජ්‍යේෂ්ඨ නිලධාරින් පවසා සිටින්නේ මෙම පිරිස පරීක්ෂා කිරීමේ දී මෙතෙක් මෙරටින් වාර්තා වූ කොවිඩ් වයිරසයේ ධාරිතාවට වඩා වැඩි ධාරිතාවක් එම වයිරසයේ තිබෙන බව තහවුරු වී ඇති බවයි. කලින් මෙම වයිරසය ශරීරගතව තිබූ සියයට 15ත් 18ත් අතර ප්‍රමාණයක් වුවත්, මෙවර සියයට 29ත් 31ත් අතර ප්‍රමාණයක් පැවතීම නවතම තත්වයක් බවත් ඔවුන් පවසයි. බ්‍රැන්ඩික්ස් කර්මාන්තශාලාවෙන් හමුවූ පළමු රෝගීන්ගේ වයිරසය ලෝඩ් එකද 29ත් 31ත් අතර තිබූ බවත්, එමෙන්ම යුක්‍රේන ගුවන් කාර්යමණ්ඩලය නිරෝධායනය වූ හෝටලයේ සේවකයන් බ්‍රැන්ඩික්ස් සේවකයන් සමග සම්බන්ධ වීමෙන් මෙම වයිරසය ආසාදනය වූ බවටත් විමර්ශනවලින් තහවුරු වූ බව විමර්ශන වලට සම්බන්ධ වූ නිලධාරීන් පවසා තිබේ.
දෙවැනි රැල්ල ආරම්භ වූ බ්‍රැන්ඩික්ස් පොකුර නිර්මාණය වූ බව ඉන්දියාවේ විශාඛාපට්නම් සිට මත්තල ගුවන් තොටුපොළ පසුගිය සැප්තැම්බර් 22 වැනිදා පැමිණි මගින් 48ක කාර්ය මණ්ඩලයකින් බව මුලදී සඳහන් විය. එහෙත් මෙම පිරිස විශාඛාපට්නම්හි බ්‍රැන්ඩික්ස් කර්මාන්ත ශාලාවේ සේවය කළ ශ්‍රී ලාංකිකයන් වූ අතර ඔවුන් දෙවැනි රැල්ල ව්‍යාප්ත වන විටත් දකුණේ හෝටලයක නිරෝධායනය වෙමින් සිටි බවට අනතුරුව තහවුරු විය.
