මෙරට ජනගහනයෙන් 20% කට කොරෝනා එන්නත ලබා දීමට පියවර
කොවිඩ්-19 ආසාදනය වීම වළක්වා ගැනීම සඳහා භාවිත කරන එන්නත මෙරට ජනගහනයෙන් 20% ක් සඳහා ලබාදීමට ලෝක සෞඛ්‍ය සංවිධානය එකඟ වී තිබේ.
මෙම එන්නත මෙරට භාවිත කිරීම සම්බන්ධයෙන් විශේෂ සාකච්ඡාවක් ඊයේ (09දා) සෞඛ්‍ය අමාත්‍යවරියගේ ප‍්‍රධානත්වයෙන් සහ ඖෂධ නිෂ්පාදන, සැපයීම සහ නියාමන රාජ්‍ය අමාත්‍ය චන්න ජයසුමන මහතාගේ සහ ලෝක සෞඛ්‍ය සංවිධානයේ මෙරට නේවාසික නියෝජිත වෛද්‍ය රාසියා පෙන්ඩ්සේ මහත්මියගේ සහභාගිත්වයෙන් සෞඛ්‍ය අමාත්‍යාංශයේදී පැවැත්විණු අතර මෙරට ජනගහනයෙන් 20% කට මෙම එන්නත ලබාදීම සදහා ලෝක සෞඛ්‍ය සංවිධානය එහිදී එකඟ වී තිබේ.
සෞඛ්‍ය අමාත්‍යවරිය විසින් මෙහිදී විශේෂ කමිටුවක් පත්කර ඇති අතර, මෙම කමිටුව පත් කර ඇත්තේ අදාළ එන්නත ලබාදීමට අවශ්‍ය අරමුදල් සම්පාදනය කිරීම, එන්නත ලබා දෙන්නේ කුමන පිරිස් වලට දැයි තීරණය කිරීම, ඊට අදාළ භෞතික සම්පත් කළමනාකරණය, තොරතුරු ලබාගැනීම, කරුණු ගොනු කිරීම වැනි කාරණා සම්බන්ධයෙන් සොයාබැලීමටයි.
