මත්ද්රව්ය ජාවාරම්වල නිරත පුද්ගලයන් සම්බන්ධයෙන් කිසිදු සහනයක් දැක්වීමට රජය සූදානම් නොමැති බව අධිකරණ හා ජාතික ඒකාබද්ධතා අමාත්ය හර්ෂණ නානායක්කාර මහතා පවසයි.
අමාත්යවරයා සඳහන් කළේ නඩු කටයුතු කඩිනම් කරමින් පවතින ප්රමාදයන් ඉවත් කිරීමේ වැඩපිළිවෙළ යටතේ අගෝස්තු මාසය තුළ පමණක් රජයේ රස පරීක්ෂක වාර්තා 9,081ක් නිකුත් කර ඇති බවයි.
සිරගෙවල් තුළ හදිසි තත්ත්වයන්ට ප්රතිචාර දැක්වීම සඳහා සම්බන්ධීකරණ යාන්ත්රණයක් ස්ථාපිත කිරීම සහ රැඳවියන්ගේ සුබසාධන කටයුතු විධිමත් කිරීම සම්බන්ධයෙන් සැප්තැම්බර් 1 වැනිදා මහර බන්ධනාගාරයේ පැවති සාකච්ඡාවකට එක්වෙමින් අමාත්යවරයා මේ බව පැවසීය.
රජයේ රස පරීක්ෂක වාර්තා නිකුත් කිරීමේ ප්රමාදයන් විසඳීම සඳහා අවශ්ය බඳවා ගැනීම් සහ පහසුකම් රජයේ රස පරීක්ෂක දෙපාර්තමේන්තුවට ලබාදීම ඇතුළු පියවර ගෙන ඇති බවද ඔහු සඳහන් කළේය.
අමාත්යවරයාට අනුව, මහර බන්ධනාගාරයේ රැඳවියන් සම්බන්ධ රජයේ රස පරීක්ෂක වාර්තා 500කට ආසන්න සංඛ්යාවක් පසුගිය අගෝස්තු මාසයේදී නිකුත් කර තිබේ.
බන්ධනාගාරගතව සිටින රිමාන්ඩ් රැඳවියන් අමතමින් නානායක්කාර මහතා ඔවුන් නිදහස් වූ පසු නැවත මත්ද්රව්ය සම්බන්ධ වැරදිවලට යොමු නොවන ලෙස ඉල්ලා සිටියේය.
“බන්ධනාගාරයෙන් පිටව ගිය පසු නැවත මත්ද්රව්ය සම්බන්ධ වැරදිවලට සම්බන්ධ වෙන්න එපා. සමාජයේ යහපත් පුද්ගලයෙකු වීමට උත්සාහ කරන්න. නමුත් මත්ද්රව්ය අලෙවි කරන පුද්ගලයන්ට කිසිදු අනුකම්පාවක් දැක්වීමට අපි සූදානම් නැහැ,” යැයි අමාත්යවරයා පැවසීය.
ශ්රී ලංකාවේ ශ්රම බලකායේ කොටසක් වන බන්ධනාගාර රැඳවියන්ට රටේ ඉදිරි ගමන සඳහා දායක වීමේ වගකීමක් ඇති බවද අමාත්යවරයා ඔවුන්ට පෙන්වා දුන්නේය.
මේ අතර, රැඳවියන් සම්බන්ධ මෑතකාලීන සිදුවීමකදී ඇති වූ ගින්නකින් හානි වූ මහර බන්ධනාගාරයේ ප්රධාන ජේලර් කාර්යාලය, පුනරුත්ථාපන අංශය සහ වියන කටයුතු සිදුකරන අංශ ඇතුළු ස්ථාන කිහිපයක්ද අමාත්යවරයාගේ නිරීක්ෂණයට ලක් විය.
යෝජිත හදිසි අවස්ථා සම්බන්ධීකරණ යාන්ත්රණය පිළිබඳ සාකච්ඡාවට බන්ධනාගාර දෙපාර්තමේන්තුව, පොලිසිය, ගුවන් හමුදාව, නාවික හමුදාව, ලංකා විදුලිබල මණ්ඩලය, ගිනි නිවීමේ සේවා සහ අනෙකුත් රාජ්ය ආයතනවල නිලධාරීහුද එක්ව සිටියහ.
