ඡන්දයට අහවල් දිනය දෙන්නැයි කිසිවෙකුගෙන් බලපෑමක් ආවේ නෑ – මහින්ද දේශප්‍රිය
මැතිවරණය සදාකාලිකව කල් දැමිය නොහැකි බවත් නිලධාරීන් එසේ බලාපොරොත්තු වන්නේ නම් මැතිවරණ කොමිෂන් සභාවේ සභාපතිවරයා ලෙස තමන් රටේ ප්‍රජාතන්ත්‍රවාදය ආරක්ෂා කළ යුතු බවටත් තරයේ විශ්වාස කරන බවත් මැතිවරණ කොමිෂන් සභාවේ සභාපති මහින්ද දේශප්‍රිය මහතා පවසයි.
ප්‍රජාතන්ත්‍රවාදයේ මහෝත්සවය ඡන්ද විමසීම ලෙස සැලකිය හැකි නමුත් මේ මෙහොතේ මැතිවරණය පවත්වා ජනතාවගේ ජීවිතය ආපදාවට ලක් කිරීමට නොහැකි බවත් ඒ මහතා ප්‍රකාශ කළේය.
ඡන්දය තියන්න කීම මෙන්ම කල් දාන්න කීම ද බලපෑමක් බව කී ඒ මහතා දිනයක් දිය යුතු යැයි පෙන්වා දීම හැර අසවල් දිනය දිය යුතු බවට කිසිවෙකුගේ බලපෑමක් සිදු නොවූ බවත්, ඒ බව අගමැතිවරයාගේ ලිපියේ අවසන් වැකියෙන් පැහැදිලි වන බවත් පෙන්වා දුන් කොමසාරිස්වරයා, සමාජ දුරස්තභාවය තබා ගෙන මැතිවරණය පැවැත්වීමට අදාළ ව තීරණ ගන්නා බවත් පුරවැසියාගේ ජීවිත අවදානමේ දැමිය නොහැකි බවත් කීවේය.
මැතිවරණයේ විශ්වසනීයභාවය තබා ගැනීම මෙහිදී වැදගත් ම කාරණය බවත් හෙතෙම අවධාරණය කළේය.
මැතිවරණය සම්බන්ධයෙන් තීරණ ගත්තේ අපේ කොමිසන් සභාවේ සියලුම දෙනා සහ රටේ වගකිව යුතු අංශ සාමාජිකයින් සමඟ සාකච්ඡා කිරීමෙන් අනතුරුව බවත් ඒ සියලු දෙනා ඡන්දය තියනවට කැමැති නමුත් විහිළුවක් නොවන විදියට පැහැදිලි දිනයක් අවශ්‍ය බව සියළුම දෙනාගේ මතය බවත් හෙතෙම පැවසීය.
