ඉරිදා (18) නිකුත් කළ නිවේදනයකින් ගම්පහ දිස්ත්‍රික් පාර්ලිමේන්තු මන්ත්‍රීවරයා සඳහන් කළේ, රජයට සම්බන්ධ පුවත්පත් ආයතනයකට අයත් සමාජ මාධ්‍ය ගිණුමක් ඇතුළු මාධ්‍ය ආයතන කිහිපයක්, අත්අඩංගුවට ගත් සැකකරු සමඟ තමන්ට සම්බන්ධයක් ඇති බවට හැඟවෙන වාර්තා පළ කර ඇති බවයි.
මේ සම්බන්ධයෙන් කරුණු පැහැදිලි කළ රාජකරුණා මහතා කියා සිටියේ, තම පවුලේ සහෝදරියන් තිදෙනකු සිටින අතර තමන් එම පවුලේ එකම පුත්‍රයා බවත්, තමන්ට සහෝදරයන් නොමැති බවත්ය.
එක්තරා වාසගමක් සහිත පුද්ගලයකු වරදක් කළ පමණින් එම වාසගම සහිත සියලු දෙනාටම එම වරද ආරෝපණය කළ යුතුදැයි ඔහු ප්‍රශ්න කළේය.
වසර 11ක් පාර්ලිමේන්තුව නියෝජනය කර තිබුණ ද පාර්ලිමේන්තු මන්ත්‍රීවරුන්ට ලබාදෙන ගිනිඅවිය තමන් කිසිදා ලබාගෙන නොමැති බව ද රාජකරුණා මහතා සඳහන් කළේය. තම අභාවප්‍රාප්ත පියා වන සරත් චන්ද්‍ර රාජකරුණා මහතා සතුව ද කිසිදා ගිනිඅවියක් නොතිබූ බව ඔහු වැඩිදුරටත් පැවසීය.
තමන්ට කිසිදු සම්බන්ධයක් නොමැති සිද්ධියකට තම නම හිතාමතා සම්බන්ධ කරමින්, දේශපාලනික වශයෙන් තම කීර්තිනාමයට හානි කිරීමේ අරමුණින් ඇතැම් මාධ්‍ය ආයතන කටයුතු කර ඇති බවට ද මන්ත්‍රීවරයා චෝදනා කළේය.
අදාළ වාර්තා පළ කළ මාධ්‍ය ආයතනවලට එරෙහිව නීතිමය ක්‍රියාමාර්ග ගැනීම සම්බන්ධයෙන් සලකා බලන ලෙස තම නීතිඥවරුන්ට උපදෙස් දී ඇති බව ද ඔහු පැවසීය.
රජයට එරෙහිව ඉහළ යමින් පවතින සමාජ පීඩනය සහ විවේචනවලින් මහජන අවධානය වෙනතකට යොමු කිරීම සඳහා ජාතික ජන බලවේගයේ (NPP) රජය මෙවැනි ක්‍රියාකාරකම්වල නිරත වන බවට ද විපක්ෂ මන්ත්‍රීවරයා චෝදනා කළේය.
