පාරිභෝගික සෞඛ්යය ආරක්ෂා කිරීමේ අරමුණින් මේ වසරේ මේ දක්වා දිවයින පුරා ඖෂධ අලෙවිසැල් 471ක් විශේෂ වැටලීම් සහ පරීක්ෂාවන්ට ලක්කර ඇති බව පාරිභෝගික කටයුතු අධිකාරිය පවසයි.
පාරිභෝගික කටයුතු අධිකාරිය නිවේදනයක් නිකුත් කරමින් සඳහන් කළේ අගෝස්තු 3 සහ 4 යන දිනවල ක්රියාත්මක කළ විශේෂ පරීක්ෂණ හා නීති ක්රියාත්මක කිරීමේ වැඩසටහනක් යටතේ ඖෂධ අලෙවිසැල් 109ක් පරීක්ෂාවට ලක්කර උල්ලංඝනය කිරීම් 86ක් හඳුනාගත් බවයි.
2026 ජනවාරි 1 සිට ජුනි 30 දක්වා කාලය තුළ දිවයින පුරා ඖෂධ අලෙවිසැල් 362ක් පරීක්ෂාවට ලක්කර තිබූ බව අධිකාරිය සඳහන් කළේය.
නවතම මෙහෙයුමත් සමඟ මෙම වසරේ සිදුකර ඇති විශේෂ ඖෂධ අලෙවිසැල් වැටලීම් සහ පරීක්ෂණ සංඛ්යාව 471 දක්වා ඉහළ ගොස් තිබේ.
මෙම වැටලීම්වලින් අනතුරුව අධිකරණ ක්රියාමාර්ගවලට යොමු කළ නඩු හරහා රුපියල් 2,269,500ක දඩ මුදල් අයකර ඇති බවද පාරිභෝගික කටයුතු අධිකාරිය සඳහන් කළේය.
කල් ඉකුත් වූ ඖෂධ සහ ඖෂධ නිෂ්පාදන අලෙවි කිරීම, පාරිභෝගිකයන් සඳහා අනිවාර්ය තොරතුරු නොමැති ඖෂධ අලෙවි කිරීම සහ පාරිභෝගික තොරතුරු ලබාදීම සම්බන්ධ නීති උල්ලංඝනය කිරීම් ඇතුළු වැරදි රැසක් විමර්ශනවලදී අනාවරණය වී තිබේ.
මීට අමතරව, ඖෂධ අලෙවිසැල් හරහා අලෙවි කරන වෛද්ය උපකරණ, ළදරු නිෂ්පාදන සහ අනෙකුත් පාරිභෝගික භාණ්ඩ සම්බන්ධ විවිධ නීති උල්ලංඝනය කිරීම්ද හඳුනාගෙන ඇත.
වැටලීම් අතරතුර කල් ඉකුත් වූ ඖෂධ, පෙති, එන්නත්, සිරින්ජ, ක්රීම්, ළදරු නිෂ්පාදන, ගර්භණී පරීක්ෂණ කට්ටල, වෛද්ය උපකරණ සහ තවත් පාරිභෝගික භාණ්ඩ රැසක් අත්අඩංගුවට ගෙන ඇති අතර, ඒවා අදාළ මහේස්ත්රාත් අධිකරණ හමුවේ ඉදිරිපත් කිරීමට නියමිත බව අධිකාරිය සඳහන් කළේය.
