එජාප සම්මේලනයේදී සජිත්ගේ හා රනිල්ගේ තැන් තහවුරු වුණු හැටි

එක්සත් ජාතික පක්ෂ නියෝජ්‍ය නායක සජිත් ප්‍රේමදාස මහතා ජනාධිපති අපේක්ෂකත්වයට පත්කිරීම සඳහා එක්සත් ජාතික පක්ෂ නායක අග්‍රාමාත්‍ය රනිල් වික්‍රමසිංහ මහතා ඉදිරිපත්කළ යෝජනාවකට අද පෙරවරුවේ පැවති එක්සත් ජාතික පක්ෂ විශේෂ මහා සම්මේලනයේදී අනුමැතිය හිමි වුණි. සම්මේලනය පැවැත්වුණේ කොළඹ සුගතදාස ගෘහස්ථ ක්‍රීඩාංගණයේදීයි.

එහිදී එක්සත් ජාතික පක්ෂ ජනාධිපති අපේක්ෂකයා පිළිබඳව සම්මේලනයට යෝජනා කිරීම සඳහා එක්සත් ජාතික පක්ෂ නායක රනිල් වික්‍රමසිංහ මහතාට ආරාධනා කෙරුණි. එහිදි ජනාධිපති අපේක්ෂකයා ලෙස එක්සත් ජාතික පක්ෂ නියෝජ්‍ය නායක සජිත් ප්‍රේමදාස මහතාගේ නම යෝජනා කළේය.

අනතුරුව එක්සත් ජාතික පක්ෂ මහලේකම් අකිල විරාජ් කාරියවසම් මහතා විසින් සම්මේලනයට තවත් යෝජනා 05ක් ඉදිරිපත් කර අනුමැතිය ලබා ගත්තේය.
2019 සැප්තැම්බර් 26වන දින කෘත්‍යාධිකාරී මණ්ඩලය විසින් අනුමත කරන ලද යොජනා 03ක් වු බලය බෙදා හැරීම, මැතිවරණ ක්‍රමයේ ප්‍රතිසංස්කරණ සහ අගමැතිවරයාගේ එකඟතාවය මත ක්‍රියාත්මක වන විධායක ජනාධිපතිධුරය ආදී රජය විසින් ආරම්භ කරන ලද ව්‍යවස්ථා ප්‍රතිසංස්කරණ තවදුරටත් ඉදිරියට ගෙනයාමේ යෝජනාවද පක්ෂ සම්මේලනයේදී අනුමත වුණි.
එමෙන්ම පක්ෂ ව්‍යවස්ථාවේ 08.01(අ) වගන්තිය අනුව 2019 ජනවාරි 24වනදා පක්ෂ කෘත්‍යාධිකාරී මණ්ඩලය විසින් පක්ෂ නායකධුරය සඳහා රනිල් වික්‍රමසිංහ මහතා පත් කිරීමට ගත් තීරණයද මෙම සම්මේණය විසින් යළි තහවුරු කරීමේ යෝජනාවක් ද සම්මත වුණි.
පාර්ලිමේන්තු ප්‍රජාතන්ත්‍රවාදය උදෙසා නොපැකිළිව ක්‍රියාකළ කථානායක කරූ ජයසුරිය මහතාට ගෞරවයණී ආචාර්ය පුද කළ යුතු බවට යෝජනාවක් ඇතුළු යෝජනා 06ක් පක්ෂ විශේෂ සම්මේලනයේදී අනුමත කෙරිණි.