ශ්රී ලංකාවේ සමස්ත දළ රාජ්ය ණය ප්රමාණය 2026 ජුනි මස අවසන් වන විට රුපියල් ට්රිලියන 33කට ආසන්න වී ඇති බව රාජ්ය ණය කළමනාකරණ කාර්යාලය නිකුත් කළ නවතම සංඛ්යාලේඛන ණය බුලටින් වාර්තාව පෙන්වා දෙයි.
ජුනි 30 වැනිදා වන විට සමස්ත රාජ්ය ණය ප්රමාණය රුපියල් ට්රිලියන 32.977ක් වූ අතර, මාර්තු අවසානයේ එය රුපියල් ට්රිලියන 32.233ක් විය. ඒ අනුව දෙවැනි කාර්තුව තුළ රාජ්ය ණය ප්රමාණය රුපියල් බිලියන 744කින් පමණ ඉහළ ගොස් තිබේ.
කෙසේ වෙතත්, රුපියල්වලින් ණය ප්රමාණය ඉහළ ගියද, ඇමරිකානු ඩොලර්වලින් ගණනය කිරීමේදී එය අඩුවී තිබේ. මාර්තු අවසානයේ ඇමරිකානු ඩොලර් බිලියන 102.27ක් වූ සමස්ත ණය ප්රමාණය ජුනි අවසානය වන විට ඩොලර් බිලියන 97.95ක් දක්වා පහත වැටී ඇත. ජුනි මාසයේ සංඛ්යා ගණනය කිරීම සඳහා එක් ඇමරිකානු ඩොලරයක් රුපියල් 336.6623ක් වූ කාර්තුව අවසාන විනිමය අනුපාතය භාවිත කර ඇති බවද වාර්තාව සඳහන් කරයි.
සමස්ත ණය ප්රමාණයෙන් වැඩිම කොටස මධ්යම රජයේ ණය වන අතර, එය ජුනි අවසානය වන විට රුපියල් ට්රිලියන 31.999ක් දක්වා ඉහළ ගොස් තිබේ. මාර්තු අවසානයේ එම ප්රමාණය රුපියල් ට්රිලියන 31.193ක් විය.
මධ්යම රජයේ ණය අතරින් දේශීය රාජ්ය ණය රුපියල් ට්රිලියන 19.203ක් වන අතර, විදේශීය රාජ්ය ණය රුපියල් ට්රිලියන 12.796ක් වේ.
විදේශීය රාජ්ය ණය ප්රමාණය මාර්තු අවසානයේ ඩොලර් බිලියන 37.47ක් වූ අතර, ජුනි අවසානය වන විට එය ඩොලර් බිලියන 38.01ක් දක්වා ඉහළ ගොස් තිබේ. එය ඩොලර් මිලියන 540ක නාමික ඉහළ යාමකි.
විදේශීය රාජ්ය ණයවලින් සියයට 38ක් බහුපාර්ශ්වික ණය වන අතර, වාණිජ ණය සියයට 34ක් සහ ද්විපාර්ශ්වික ණය සියයට 28ක් වේ.
ද්විපාර්ශ්වික ණය හිමියන් අතර තවදුරටත් චීනය විශාලතම ණය හිමියා වන අතර, චීනයට ගෙවීමට ඇති ණය ප්රමාණය ඩොලර් බිලියන 5.01කි. ජපානයට ඩොලර් බිලියන 2.27ක්ද, ඉන්දියාවට ඩොලර් මිලියන 853.9ක්ද ගෙවීමට තිබේ.
රාජ්ය ව්යවසායන් සඳහා රජය විසින් සහතික කළ ණය ප්රමාණය රුපියල් බිලියන 971ක් වූ අතර, පළාත් සභා සහ පළාත් පාලන ආයතනවලට අදාළ ණය ප්රමාණය රුපියල් බිලියන 7ක් පමණ වේ.
2026 දෙවැනි කාර්තුවට අදාළ රාජ්ය ණය කළමනාකරණ කාර්යාලයේ සංඛ්යාලේඛන ණය බුලටින් වාර්තාව අගෝස්තු 28 වැනිදා නිකුත් කර තිබේ.
