රනිල් සමග පක්ෂය ඉදිරියට ගෙනයන හැටි අකිල කියයි

පක්ෂ නායකත්වය හා එළැඹෙන මහ මැතිවරණය සම්බන්ධයෙන් ඉදිරි ක්‍රියාමාර්ග ගැනීම සඳහා එක්සත් ජාතික පක්ෂ නායක රනිල් වික්‍රමසිංහ මහතා කමිටුවක් පත්කර ඇතැයි ද පක්ෂයක් ලෙස සියලු දෙනා එකතු වී එක් හඬකින් පක්ෂය ඉදිරියට ගෙන ගියහොත් පාර්ලිමේන්තුව තුළ 113 සැදිය හැකි බවද ‍එක්සත් ජාතික පක්ෂයේ මහලේකම් අකිල විරාජ් කාරියවසම් මහතා පවසයි.

අද(10) පෙරවරුවේ පැවති මාධ්‍ය හමුවකට එක්වෙමින් ඔහු මේ බව සඳහන් කළේය.

මෙහිදී වැඩිදුරටත් අදහස් දැක්වු අකිල විරාජ් කාරියවසම් මහතා පවසා සිටියේ, පාර්ලිමේන්තු මැතිවරණයට තව මාස කීපයක් ඇති බවයි.

2015 ජනවාරි 8 වන දා ජනාධිපතිවරණය ජයග්‍රහණය කළත් 2015 අගෝස්තු 17 තිබු පාර්ලිමේන්තු මැතිවරණයෙන් පක්ෂයට බහුතරයක් ජය ගත නොහැකි වු බවත් ඔහු කියා සිටියේය.

ඒ නිසාවෙන් ඒ පාඩම වත්මන් ආණ්ඩුවටත් ඉගැන්වීමට අවශ්‍ය බව සඳහන් කර සිටි මන්ත්‍රීවරයා, එක්සත් ජාතික පක්ෂය යනු මහත්වරුන්ගේ ප්‍රජාතන්ත්‍රවාදී පක්ෂයක් බවත් පැවසීය.

මේ පක්ෂය ඉදිරියට ගෙන යා යුතු බවත්, එයට හානි කිරීමට කිසිවෙකුට නොහැකි බවත් පැවසු මන්ත්‍රීවරයා ඒ නිසාවෙන් සියලු නායකයින් එකතු වී මෙම ගමන යා යුතු බවත් කියා සිටියේය. ආණ්ඩුවේ න්‍යාය පත්‍රයට අනුව වැඩ කිරීමට තම පක්ෂයට කිසිදු හැකියාවක් නොමැති බව පැවසු ඒ මහතා, පක්ෂයේ දේවල් සමාජය ඉදිරියට විත් පවසා විවේචනය කිරිම් සිදු කරන්නේ නම් එයට එරෙහිව ඉදිරියේ දී ක්‍රියාමාර්ගයක් ගැනීමට බලාපොරොත්තු වන බවත් පැවසීය‍.

පක්ෂය තුළ සජිත් ප්‍රේමදාස මහතා ඇතුළු සියලු නායකයින් එකතු කරමින් ගමන් මාර්ගය ගොඩනඟමින් යන බවත් පැවසු මන්ත්‍රීවරයා, පක්ෂයේ සියලු සාමාජිකයින් නියෝජනය කරමින් පක්ෂ නායකවරයා විසින් කමිටුවක් ද පත් කර ඇතැයි කියා සිටියේය.

එම කමිටුව මඟින් ඉදිරි මහ මැතිවරණය හා නායකත්වයන් ගැන සියලු තීරණ ගනු ලබන බවත් පැවසු අකිල විරාජ් කාරියවසම් මහතා, පක්ෂය තුළ විනයක් ඇති බවත් පැවසීය.

 

Leave a Reply

Your email address will not be published.